tum hamein ek din dasht mein chhoD kar chal diye the tumhein kya KHabar ya aKHi

tum hameñ ek din dasht meñ chhoḌ kar chal diye the tumheñ kyā ḳhabar yā aḳhī

kitne mausam lage haiñ hamāre badan par nikalne meñ ye bāl-o-par yā aḳhī

shab-gazīda dayāroñ ke nāqa-savāroñ meñ mahtāb-chehra tumhārā na thā

ḳhaak meñ mil ga.e raah takte hue sab ḳhamīda kamar bām-o-dar yā aḳhī

jañg kā faisla ho chukā hai to phir mere dil kī kamīñ-gāh meñ kaun hai

ik shaqī kāTtā hai tanābeñ mire ḳhema-e-ḳhvāb kī raat bhar yā aḳhī

ye bhī achchhā huā tum is āshob se apne sarsabz baazū bachā le ga.e

yuuñ bhī kū-e-ziyāñ meñ lagānā hī thā ham ko apne lahū kā shajar yā aḳhī

nahr is shahr kī bhī bahut mehrbāñ hai magar apnā rahvār mat roknā

hijratoñ ke muqaddar meñ baaqī nahīñ ab koī qarya-e-mo'tabar yā aḳhī

zard pattoñ ke ThanDe badan apne hāthoñ pe le kar havā ne shajar se kahā

agle mausam meñ tujh par na.e barg-o-bār ā.eñge tab talak sabr kar yā aḳhī

tum hamein ek din dasht mein chhoD kar chal diye the tumhein kya KHabar ya aKHi

kitne mausam lage hain hamare badan par nikalne mein ye baal-o-par ya aKHi

shab-gazida dayaron ke naqa-sawaron mein mahtab-chehra tumhaara na tha

KHak mein mil gae rah takte hue sab KHamida kamar baam-o-dar ya aKHi

jang ka faisla ho chuka hai to phir mere dil ki kamin-gah mein kaun hai

ek shaqi kaTta hai tanaben mere KHema-e-KHwab ki raat bhar ya aKHi

ye bhi achchha hua tum is aashob se apne sarsabz bazu bacha le gae

yun bhi ku-e-ziyan mein lagana hi tha hum ko apne lahu ka shajar ya aKHi

nahr is shahr ki bhi bahut mehrban hai magar apna rahwar mat rokna

hijraton ke muqaddar mein baqi nahin ab koi qarya-e-mo'tabar ya aKHi

zard patton ke ThanDe badan apne hathon pe le kar hawa ne shajar se kaha

agle mausam mein tujh par nae barg-o-bar aaenge tab talak sabr kar ya aKHi