tum haqiqat nahin ho hasrat ho

tum haqīqat nahīñ ho hasrat ho

jo mile ḳhvāb meñ vo daulat ho

maiñ tumhāre hī dam se zinda huuñ

mar hī jā.ūñ jo tum se fursat ho

tum ho ḳhushbū ke ḳhvāb kī ḳhushbū

aur utnī hī be-muravvat ho

tum ho pahlū meñ par qarār nahīñ

ya.anī aisā hai jaise furqat ho

tum ho añgḌā.ī rang-o-nik.hat kī

kaise añgḌā.ī se shikāyat ho

kis tarah chhoḌ duuñ tumheñ jānāñ

tum mirī zindagī kī aadat ho

kis liye dekhtī ho ā.īna

tum to ḳhud se bhī ḳhūb-sūrat ho

dāstāñ ḳhatm hone vaalī hai

tum mirī āḳhrī mohabbat ho

tum haqiqat nahin ho hasrat ho

jo mile KHwab mein wo daulat ho

main tumhaare hi dam se zinda hun

mar hi jaun jo tum se fursat ho

tum ho KHushbu ke KHwab ki KHushbu

aur utni hi be-murawwat ho

tum ho pahlu mein par qarar nahin

yani aisa hai jaise furqat ho

tum ho angDai rang-o-nikhat ki

kaise angDai se shikayat ho

kis tarah chhoD dun tumhein jaanan

tum meri zindagi ki aadat ho

kis liye dekhti ho aaina

tum to KHud se bhi KHub-surat ho

dastan KHatm hone wali hai

tum meri aaKHri mohabbat ho