tum ho meri zist ka hasil shahzade

tum ho merī ziist kā hāsil shahzāde

toḌ na denā tum merā dil shahzāde

apne andar tum ko dekh rahī huuñ maiñ

ā.īna hai mere muqābil shahzāde

sīm-o-zar par itrāte the dekho ab

ishq nagar meñ ban ga.e saa.il shahzāde

shahzādī ne dil haarā aur jiitī jañg

māl-e-ġhanīmat meñ tum shāmil shahzāde

vasl kī rut kā ab to istiqbāl karo

kuuk rahī hai baaġh meñ koyal shahzāde

shahzāde ye duniyā fikr meñ ġhaltāñ hai

jab se maiñ huuñ tum par maa.il shahzāde

Dagar Dagar maiñ bhaTak rahī huuñ aaj talak

tujh se bichhaḌ kar kaisī manzil shahzāde

ik jānib tū dūsrī jānib terī 'rabāb'

ek zamāna beach meñ haa.il shahzāde

tum ho meri zist ka hasil shahzade

toD na dena tum mera dil shahzade

apne andar tum ko dekh rahi hun main

aaina hai mere muqabil shahzade

sim-o-zar par itraate the dekho ab

ishq nagar mein ban gae sail shahzade

shahzadi ne dil haara aur jiti jang

mal-e-ghanimat mein tum shamil shahzade

wasl ki rut ka ab to istiqbaal karo

kuk rahi hai bagh mein koyal shahzade

shahzade ye duniya fikr mein ghaltan hai

jab se main hun tum par mail shahzade

Dagar Dagar main bhaTak rahi hun aaj talak

tujh se bichhaD kar kaisi manzil shahzade

ek jaanib tu dusri jaanib teri 'rabab'

ek zamana beach mein hail shahzade