tum jaante ho kis liye wo mujhse gaya laD

tum jānte ho kis liye vo mujh se gayā laḌ

ai hamdam-e-man us ke kahīñ aur lagī laḌ

us ne shajar-e-dostī ab dil se ukhāḌā

kahne se raqīboñ ke hai fitne kī bañdhī jaḌ

us but ko kahāñ pahuñcheñ but aazar ke tarāshe

haath apne se tayyār kare jis ko ḳhudā ghaḌ

dil-doz nigah yaar kī hotī hai muqābil

barchhī kī anī sī mire siine meñ ga.ī gaḌ

ḳhajlat se tū phir sāmne āñkheñ na karegā

ai abr mire girya kī jis vaqt lagī jhaḌ

ḳhat kā ye javāb aayā ki qāsid gayā jī se

sar ek taraf loTe hai aur ek taraf dhaḌ

rindoñ ne evaz visme ke nuurā jo lagāyā

paakī kī tarah shaiḳh kī dāḌhī bhī ga.ī jhaḌ

tirchhī nigah us kī ki huā koī na aaḌe

siine ko sipar kar ke rahe ek hamīñ aḌ

sahrā-e-junūñ se 'muhib' us zulf kī zanjīr

phir pech meñ le aa.ī mujhe paañv mire paḌ

tum jaante ho kis liye wo mujh se gaya laD

ai hamdam-e-man us ke kahin aur lagi laD

us ne shajar-e-dosti ab dil se ukhaDa

kahne se raqibon ke hai fitne ki bandhi jaD

us but ko kahan pahunchen but aazar ke tarashe

hath apne se tayyar kare jis ko KHuda ghaD

dil-doz nigah yar ki hoti hai muqabil

barchhi ki ani si mere sine mein gai gaD

KHajlat se tu phir samne aankhen na karega

ai abr mere girya ki jis waqt lagi jhaD

KHat ka ye jawab aaya ki qasid gaya ji se

sar ek taraf loTe hai aur ek taraf dhaD

rindon ne ewaz wisme ke nura jo lagaya

paki ki tarah shaiKH ki daDhi bhi gai jhaD

tirchhi nigah us ki ki hua koi na aaDe

sine ko sipar kar ke rahe ek hamin aD

sahra-e-junun se 'muhib' us zulf ki zanjir

phir pech mein le aai mujhe panw mere paD