tum jalwa dikhao to zara parda-e-dar se

tum jalva dikhāo to zarā parda-e-dar se

ham thak ga.e nazzāra-e-ḳhurshīd-o-qamar se

majbūr-e-numā.ish nahīñ kuchh husn hī un kā

ham bhī to haiñ majbūr taqāzā-e-nazar se

bachhḌā huā jaise koī milte hī lipaT jaa.e

yuuñ tiir tirā aa ke lipaTtā hai jigar se

kaTte nahīñ kyuuñ shām-e-judā.ī ke ye lamhe

miltī nahīñ kyuuñ zulmat-e-shab jā ke sahar se

karnā hai kisī din use ham-dosh-e-surayyā

hai aah abhī tak mirī mahrūm asar se

ho jaa.eñ hamesha ke liye aap jo mere

maiñ maañg luuñ kuchh umr yahāñ umr-e-ḳhizar se

aisā to na kar pā.egā koī bhī fusūñ-kār

vo kar ga.e jo sādgī-e-husn-e-nazar se

āsūda-e-manzil nahīñ āgāh-e-sa.ūbat

mahrūm hai vo lazzat-e-dūrī-e-safar se

tum jalwa dikhao to zara parda-e-dar se

hum thak gae nazzara-e-KHurshid-o-qamar se

majbur-e-numaish nahin kuchh husn hi un ka

hum bhi to hain majbur taqaza-e-nazar se

bachhDa hua jaise koi milte hi lipaT jae

yun tir tera aa ke lipaTta hai jigar se

kaTte nahin kyun sham-e-judai ke ye lamhe

milti nahin kyun zulmat-e-shab ja ke sahar se

karna hai kisi din use ham-dosh-e-surayya

hai aah abhi tak meri mahrum asar se

ho jaen hamesha ke liye aap jo mere

main mang lun kuchh umr yahan umr-e-KHizar se

aisa to na kar paega koi bhi fusun-kar

wo kar gae jo sadgi-e-husn-e-nazar se

aasuda-e-manzil nahin aagah-e-saubat

mahrum hai wo lazzat-e-duri-e-safar se