tum jo kahte ho ki aawenge tere han kal tak

tum jo kahte ho ki āveñge tire haañ kal tak

kaun jiitā hai judā.ī meñ mirī jaañ kal tak

tere vahshī kā agar ḳhaak uḌānā hai yahī

kahīñ DhūñDā bhī na pāvegā bayābāñ kal tak

kuchh bhī kahte haiñ jarāhat kī mere ai hamdam

iktifā kyūñki kare ek namak-dāñ kal tak

duur se gar use tasvīr dikhā duuñ terī

aap meñ aave na phir shāhid-e-kan.āñ kal tak

ḳhaak meñ aaj vo sar Thokareñ khāte haiñ paḌe

jo imārat kā kiyā karte the sāmāñ kal tak

dil lagātī hai abas apne liye ai bulbul

DhūñDe pāvegī na gul-hā-e-gulistāñ kal tak

kyā nazar kaam kare us ke dahan par 'ārif'

laakh dekhā kare ye dīda-e-hairāñ kal tak

tum jo kahte ho ki aawenge tere han kal tak

kaun jita hai judai mein meri jaan kal tak

tere wahshi ka agar KHak uDana hai yahi

kahin DhunDa bhi na pawega bayaban kal tak

kuchh bhi kahte hain jarahat ki mere ai hamdam

iktifa kyunki kare ek namak-dan kal tak

dur se gar use taswir dikha dun teri

aap mein aawe na phir shahid-e-kanan kal tak

KHak mein aaj wo sar Thokaren khate hain paDe

jo imarat ka kiya karte the saman kal tak

dil lagati hai abas apne liye ai bulbul

DhunDe pawegi na gul-ha-e-gulistan kal tak

kya nazar kaam kare us ke dahan par 'arif'

lakh dekha kare ye dida-e-hairan kal tak