tum kab the qarib itne main kab dur raha hun

tum kab the qarīb itne maiñ kab duur rahā huuñ

chhoḌo na karo baat ki maiñ tum se ḳhafā huuñ

rahne do ki ab tum bhī mujhe paḌh na sakoge

barsāt meñ kāġhaz kī tarah bhiig gayā huuñ

sau baar girah de ke kisī aas ne joḌā

sau baar maiñ dhāge kī tarah TuuT chukā huuñ

jā.egā jahāñ tū mirī āvāz sunegā

maiñ chor kī mānind tire dil meñ chhupā huuñ

ik nuqte pe aa kar bhī ham-āhañg nahīñ haiñ

tū apnā fasāna hai to maiñ apnī sadā huuñ

chheḌo na abhī shāḳh-e-shikasta kā fasāna

Thahro maiñ abhī raqs-e-sabā dekh rahā huuñ

manzil kā patā jis ne diyā thā mujhe 'bāqī'

us shaḳhs se raste meñ ka.ī baar milā huuñ

tum kab the qarib itne main kab dur raha hun

chhoDo na karo baat ki main tum se KHafa hun

rahne do ki ab tum bhi mujhe paDh na sakoge

barsat mein kaghaz ki tarah bhig gaya hun

sau bar girah de ke kisi aas ne joDa

sau bar main dhage ki tarah TuT chuka hun

jaega jahan tu meri aawaz sunega

main chor ki manind tere dil mein chhupa hun

ek nuqte pe aa kar bhi ham-ahang nahin hain

tu apna fasana hai to main apni sada hun

chheDo na abhi shaKH-e-shikasta ka fasana

Thahro main abhi raqs-e-saba dekh raha hun

manzil ka pata jis ne diya tha mujhe 'baqi'

us shaKHs se raste mein kai bar mila hun