tumko pata hai apne dil ko kaise humne shad kiya

tum ko pata hai apne dil ko kaise ham ne shaad kiyā

din meñ tumhāre ḳhvāb sajā.e shab-bhar tum ko yaad kiyā

āñkheñ mūñdīñ chehra dekhā aa.ī ḳhushbū saañs jo lī

tum ko yuuñ pāband kiyā aur ḳhud ko yuuñ āzād kiyā

sūraj niklā sub.h huī kab chandā chamkā raat huī

chupke chupke chhat par leTe lamhoñ ko barbād kiyā

duurī kyā hai qurbat kyā hai pyaar karo to jānoge

man se man ko joḌ liyā hai dard se dil ābād kiyā

baiThe akele soch rahe haiñ 'zāhid' kyā ye mohabbat hai

ek sanam kī ḳhātir ham ne duniyā ko nāshād kiyā

tum ko pata hai apne dil ko kaise hum ne shad kiya

din mein tumhaare KHwab sajae shab-bhar tum ko yaad kiya

aankhen mundin chehra dekha aai KHushbu sans jo li

tum ko yun paband kiya aur KHud ko yun aazad kiya

suraj nikla subh hui kab chanda chamka raat hui

chupke chupke chhat par leTe lamhon ko barbaad kiya

duri kya hai qurbat kya hai pyar karo to jaanoge

man se man ko joD liya hai dard se dil aabaad kiya

baiThe akele soch rahe hain 'zahid' kya ye mohabbat hai

ek sanam ki KHatir hum ne duniya ko nashad kiya