tum na aaoge to kya ho jaega

tum na aaoge to kyā ho jā.egā

dard ḳhud baḌh kar davā ho jā.egā

jo ḳhudī se āshnā ho jā.egā

mahram-e-rāz-e-baqā ho jā.egā

kyā pilāoge kisī suqrāt ko

zahr to āb-e-baqā ho jā.egā

ham kareñge jab navā-e-haq buland

ik zamāna ham-navā ho jā.egā

pārsā.ī dekhtī rah jā.egī

bāb-e-rahmat ham pe vā ho jā.egā

shauq-e-manzil shart hai ai rāh-rau

zarra zarra rahnumā ho jā.egā

bārgāh-e-husn par kar do nisār

zindagī kā haq adā ho jā.egā

naaz kyā hai zindagī ke saaz par

ek din ye be-sadā ho jā.egā

ham ne puujā thā kisī ko pyaar se

kyā ḳhabar thī vo ḳhudā ho jā.egā

iffat-e-qalb-o-nazar paidā to kar

husn majbūr-e-vafā ho jā.egā

kaam le 'sābir' tū sabr-o-shukr se

us kī jo hogī razā ho jā.egā

tum na aaoge to kya ho jaega

dard KHud baDh kar dawa ho jaega

jo KHudi se aashna ho jaega

mahram-e-raaz-e-baqa ho jaega

kya pilaoge kisi suqraat ko

zahr to aab-e-baqa ho jaega

hum karenge jab nawa-e-haq buland

ek zamana ham-nawa ho jaega

parsai dekhti rah jaegi

bab-e-rahmat hum pe wa ho jaega

shauq-e-manzil shart hai ai rah-rau

zarra zarra rahnuma ho jaega

bargah-e-husn par kar do nisar

zindagi ka haq ada ho jaega

naz kya hai zindagi ke saz par

ek din ye be-sada ho jaega

hum ne puja tha kisi ko pyar se

kya KHabar thi wo KHuda ho jaega

iffat-e-qalb-o-nazar paida to kar

husn majbur-e-wafa ho jaega

kaam le 'sabir' tu sabr-o-shukr se

us ki jo hogi raza ho jaega