tumne kaha tha chup rahna so chup ne bhi kya kaam kiya

tum ne kahā thā chup rahnā so chup ne bhī kyā kaam kiyā

chup rahne kī aadat ne kuchh aur hameñ badnām kiyā

farzānoñ kī tañg-dilī farzānoñ tak mahdūd rahī

dīvānoñ ne farzānoñ tak rasm-e-junūñ ko aam kiyā

kunj-e-chaman meñ aas lagā.e chup baiThe haiñ jis din se

ham ne sabā ke haath ravāna un ko ik paiġhām kiyā

ham ne batāo kis tapte sūraj kī dhuup se maanī haar

ham ne kis dīvār-e-chaman ke saa.e meñ ārām kiyā

'sahbā' kaun shikārī the tum vahshat-kesh ġhazāloñ ke

matvālī āñkhoñ ko tum ne āḳhir kaisā raam kiyā

tum ne kaha tha chup rahna so chup ne bhi kya kaam kiya

chup rahne ki aadat ne kuchh aur hamein badnam kiya

farzanon ki tang-dili farzanon tak mahdud rahi

diwanon ne farzanon tak rasm-e-junun ko aam kiya

kunj-e-chaman mein aas lagae chup baiThe hain jis din se

hum ne saba ke hath rawana un ko ek paigham kiya

hum ne batao kis tapte suraj ki dhup se mani haar

hum ne kis diwar-e-chaman ke sae mein aaram kiya

'sahba' kaun shikari the tum wahshat-kesh ghazalon ke

matwali aankhon ko tum ne aaKHir kaisa ram kiya