tum pilao ye kam ghanimat hai

tum pilāo ye kam ġhanīmat hai

mai na.ī hai to sam ġhanīmat hai

hai ḳhushī kī bhī kaifiyat ma.alūm

ho mayassar to ġham ġhanīmat hai

tum na aa.e sahar to aa hī ga.ī

dam-ba-dam dam-ba-dam ġhanīmat hai

is meñ sang-e-girāñ bhī milte haiñ

raah kā pech-o-ḳham ġhanīmat hai

raat din āsmāñ haiñ chakkar meñ

mil jo baiTheñ baham ġhanīmat hai

zindagānī kā e.atibār nahīñ

jo guzar jaa.e dam ġhanīmat hai

ka.aba-o-dair se najāt milī

terā naqsh-e-qadam ġhanīmat hai

shā.irī dil-lagī nahīñ 'shaukat'

jo hai zor-e-qalam ġhanīmat hai

tum pilao ye kam ghanimat hai

mai nai hai to sam ghanimat hai

hai KHushi ki bhi kaifiyat malum

ho mayassar to gham ghanimat hai

tum na aae sahar to aa hi gai

dam-ba-dam dam-ba-dam ghanimat hai

is mein sang-e-giran bhi milte hain

rah ka pech-o-KHam ghanimat hai

raat din aasman hain chakkar mein

mil jo baiThen baham ghanimat hai

zindagani ka eatibar nahin

jo guzar jae dam ghanimat hai

kaba-o-dair se najat mili

tera naqsh-e-qadam ghanimat hai

shairi dil-lagi nahin 'shaukat'

jo hai zor-e-qalam ghanimat hai