tum se bhi ab to ja chuka hun main

tum se bhī ab to jā chukā huuñ maiñ

dūr-hā-dūr aa chukā huuñ maiñ

ye bahut ġham kī baat ho shāyad

ab to ġham bhī gañvā chukā huuñ maiñ

is gumān-e-gumāñ ke aalam meñ

āḳhirash kyā bhulā chukā huuñ maiñ

ab babar sher ishtihā hai mirī

shā.iroñ ko to khā chukā huuñ maiñ

maiñ huuñ me.amār par ye batlā duuñ

shahr ke shahr Dah chukā huuñ maiñ

haal hai ik ajab farāġhat kā

apnā har ġham manā chukā huuñ maiñ

log kahte haiñ maiñ ne jog liyā

aur dhūnī ramā chukā huuñ maiñ

nahīñ imlā durust 'ġhālib' kā

'shefta' ko batā chukā huuñ maiñ

tum se bhi ab to ja chuka hun main

dur-ha-dur aa chuka hun main

ye bahut gham ki baat ho shayad

ab to gham bhi ganwa chuka hun main

is guman-e-guman ke aalam mein

aaKHirash kya bhula chuka hun main

ab babar sher ishtiha hai meri

shairon ko to kha chuka hun main

main hun meamar par ye batla dun

shahr ke shahr Dah chuka hun main

haal hai ek ajab faraghat ka

apna har gham mana chuka hun main

log kahte hain main ne jog liya

aur dhuni rama chuka hun main

nahin imla durust 'ghaalib' ka

'shefta' ko bata chuka hun main