tum the aur aalam bahut the

tum the aur ālām bahut the

aur vo sub.h-o-shām bahut the

tujh meñ bhī kuchh baat hai varna

dīvāne badnām bahut the

maiñ hī rahā ik pyaas kā maarā

maiḳhāne meñ jaam bahut the

chand hī nazreñ vaañ tak pahuñchīñ

nazzāre sar-e-bām bahut the

zānū-o-sar kī laaj rahī hai

pahre to har gaam bahut the

aap mirā kyoñ dam bharte haiñ

mujh par hī ilzām bahut the

fikr-e-'daur' ko tum se pahle

tere mere kaam bahut the

tum the aur aalam bahut the

aur wo subh-o-sham bahut the

tujh mein bhi kuchh baat hai warna

diwane badnam bahut the

main hi raha ek pyas ka mara

maiKHane mein jam bahut the

chand hi nazren wan tak pahunchin

nazzare sar-e-baam bahut the

zanu-o-sar ki laj rahi hai

pahre to har gam bahut the

aap mera kyon dam bharte hain

mujh par hi ilzam bahut the

fikr-e-'daur' ko tum se pahle

tere mere kaam bahut the