tumhaara hijr use aabshaar karta tha

tumhārā hijr use ābshār kartā thā

hamārī aañkh pe thal inhisār kartā thā

vo phuul dekhne aatā thā baaġh meñ har roz

maiñ ḳhushbuoñ ko vasīla shumār kartā thā

huzūr aap to dil de ke chīḳhte haiñ bahut

maiñ ek shaḳhs pe jaañ tak nisār kartā thā

maiñ chāhtā thā ki vo boltā rahe maiñ sunūñ

magar vo kam-go baḌā iḳhtisār kartā thā

mirī zabāñ pe bharosa thā is liye sab ko

ki ek shaḳhs mirā e.atibār kartā thā

ḳhudā ke baad use mujh pe maan thā kyūñki

ḳhudā ke baad use maiñ hī pyaar kartā thā

kisī kī shakl utartī thī sher ban ke 'hasīb'

koī ḳhayāl mujhe sogvār kartā thā

tumhaara hijr use aabshaar karta tha

hamari aankh pe thal inhisar karta tha

wo phul dekhne aata tha bagh mein har roz

main KHushbuon ko wasila shumar karta tha

huzur aap to dil de ke chiKHte hain bahut

main ek shaKHs pe jaan tak nisar karta tha

main chahta tha ki wo bolta rahe main sunun

magar wo kam-go baDa iKHtisar karta tha

meri zaban pe bharosa tha is liye sab ko

ki ek shaKHs mera eatibar karta tha

KHuda ke baad use mujh pe man tha kyunki

KHuda ke baad use main hi pyar karta tha

kisi ki shakl utarti thi sher ban ke 'hasib'

koi KHayal mujhe sogwar karta tha