tumhaare aastan tak aa gae hain

tumhāre āstāñ tak aa ga.e haiñ

zamīñ se āsmāñ tak aa ga.e haiñ

jinhoñ ne phūñk Daalā hai chaman ko

vo sho.ale āshiyāñ tak aa ga.e haiñ

ḳhudāyā ḳhair mere gulsitāñ kī

ki ab naġhme fuġhāñ tak aa ga.e haiñ

na pūchho marhaloñ se kaise guzre

ye dekho ham kahāñ tak aa ga.e haiñ

jinheñ ḳhud DhūñDhtī thī un kī manzil

vo gard-e-kārvāñ tak aa ga.e haiñ

na honā chāhiye thā jin kā iz.hār

vo shikve ab zabāñ tak aa ga.e haiñ

mirī barbādiyoñ ke tazkire bhī

tumhārī dāstāñ tak aa ga.e haiñ

ḳhudāyā ḳhair ho ab un ke jalve

nazar ke imtihāñ tak aa ga.e haiñ

jafā ke silsile bhī hote hote

mirī tāb-o-tavāñ tak aa ga.e haiñ

ma.āz-allāh daur-e-be-yaqīnī

yaqīñ vaale gumāñ tak aa ga.e haiñ

salām ai gardish-e-daurāñ ki ham to

dar-e-pīr-e-muġhāñ tak aa ga.e haiñ

tumhaare aastan tak aa gae hain

zamin se aasman tak aa gae hain

jinhon ne phunk Dala hai chaman ko

wo shoale aashiyan tak aa gae hain

KHudaya KHair mere gulsitan ki

ki ab naghme fughan tak aa gae hain

na puchho marhalon se kaise guzre

ye dekho hum kahan tak aa gae hain

jinhen KHud DhunDhti thi un ki manzil

wo gard-e-karwan tak aa gae hain

na hona chahiye tha jin ka izhaar

wo shikwe ab zaban tak aa gae hain

meri barbaadiyon ke tazkire bhi

tumhaari dastan tak aa gae hain

KHudaya KHair ho ab un ke jalwe

nazar ke imtihan tak aa gae hain

jafa ke silsile bhi hote hote

meri tab-o-tawan tak aa gae hain

maaz-allah daur-e-be-yaqini

yaqin wale guman tak aa gae hain

salam ai gardish-e-dauran ki hum to

dar-e-pir-e-mughan tak aa gae hain