tumhāre ġham ne hameñ is qadar sañbhāl diyā
kisī ne kuchh bhī kahā ham ne hans ke Taal diyā
mazāq-e-ishq mashiyyat ne hasb-e-hāl diyā
mujhe nigāh atā kī tumheñ jamāl diyā
jo aaj va.ada kiyā kal pe us ko Taal diyā
yuuñ roz roz kī uljhan meñ dil ko Daal diyā
tere jamāl ko dekhā to yuuñ lagā jaise
majāz meñ hī haqīqat ne ḳhud ko Dhaal diyā
jo aañkh se abhī Tapkā thā koī armāñ thā
dil-e-ġharīb ne ghar se jise nikāl diyā
na jaane kitne ġhamoñ ko masarrateñ baḳhshīñ
jo ġham diyā mujhe tū ne vo lā-zavāl diyā
ye kyā ki us ne mohabbat ke imtihāñ ke liye
kisī se hal jo na ho mujh ko vo savāl diyā
kisī kī yaad ne baḳhshīñ jo dhaḌkaneñ dil ko
unhīñ ko sher ke qālib meñ maiñ ne Dhaal diyā
'nazar' usī se na dād-e-suḳhan milī mujh ko
mirī ġhazal ne jise husn-e-lā-zavāl diyā
tumhaare gham ne hamein is qadar sanbhaal diya
kisi ne kuchh bhi kaha hum ne hans ke Tal diya
mazaq-e-ishq mashiyyat ne hasb-e-haal diya
mujhe nigah ata ki tumhein jamal diya
jo aaj wada kiya kal pe us ko Tal diya
yun roz roz ki uljhan mein dil ko Dal diya
tere jamal ko dekha to yun laga jaise
majaz mein hi haqiqat ne KHud ko Dhaal diya
jo aankh se abhi Tapka tha koi arman tha
dil-e-gharib ne ghar se jise nikal diya
na jaane kitne ghamon ko masarraten baKHshin
jo gham diya mujhe tu ne wo la-zawal diya
ye kya ki us ne mohabbat ke imtihan ke liye
kisi se hal jo na ho mujh ko wo sawal diya
kisi ki yaad ne baKHshin jo dhaDkanen dil ko
unhin ko sher ke qalib mein main ne Dhaal diya
'nazar' usi se na dad-e-suKHan mili mujh ko
meri ghazal ne jise husn-e-la-zawal diya
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.