tumhaare hone ka shayad suragh pane lage

tumhāre hone kā shāyad surāġh paane lage

kanār-e-chashm ka.ī ḳhvāb sar uThāne lage

palak jhapakne meñ guzre kisī falak se ham

kisī galī se guzarte hue zamāne lage

mirā ḳhayāl thā ye silsila diyoñ tak hai

magar ye log mire ḳhvāb bhī bujhāne lage

na-jāne raat tire mai-kashoñ ko kyā sūjhī

subū uThāte uThāte falak uThāne lage

vo ghar kare kisī dil meñ to ain mumkin hai

hamārī dar-badarī bhī kisī Thikāne lage

maiñ gungunāte hue jā rahā thā naam tirā

shajar hajar bhī mire saath gungunāne lage

hudūd-e-dasht meñ ābādiyāñ jo hone lagīñ

ham apne shahr meñ tanhā.iyāñ basāne lage

dhuāñ dhanak huā añgār phuul bante ga.e

tumhāre haath bhī kyā mo.ajaze dikhāne lage

'razā' vo ran paḌā kal shab ba-razm-gāh-e-junūñ

kulāheñ chhoḌ ke sab log sar bachāne lage

tumhaare hone ka shayad suragh pane lage

kanar-e-chashm kai KHwab sar uThane lage

palak jhapakne mein guzre kisi falak se hum

kisi gali se guzarte hue zamane lage

mera KHayal tha ye silsila diyon tak hai

magar ye log mere KHwab bhi bujhane lage

na-jaane raat tere mai-kashon ko kya sujhi

subu uThate uThate falak uThane lage

wo ghar kare kisi dil mein to ain mumkin hai

hamari dar-badari bhi kisi Thikane lage

main gungunate hue ja raha tha nam tera

shajar hajar bhi mere sath gungunane lage

hudud-e-dasht mein aabaadiyan jo hone lagin

hum apne shahr mein tanhaiyan basane lage

dhuan dhanak hua angar phul bante gae

tumhaare hath bhi kya moajaze dikhane lage

'raza' wo ran paDa kal shab ba-razm-gah-e-junun

kulahen chhoD ke sab log sar bachane lage