tumhaare jaane ka gham manaunga dekh lena

tumhāre jaane kā ġham manā.ūñgā dekh lenā

maiñ hijr-e-sahrā meñ ḳhaak uḌā.ūñgā dekh lenā

mirā ye da.avā hai muddatoñ tak maiñ ban ke aañsū

tumhārī āñkhoñ meñ jhilmilā.ūñgā dekh lenā

vo saarī ġhazleñ jo bas tumhāre liye likhī thiiñ

vo ab maiñ har shaḳhs ko sunā.ūñgā dekh lenā

ye tum jo mujh se zarā sī bātoñ pe rūThte ho

maiñ saarī duniyā se ruuTh jā.ūñgā dekh lenā

tumhārī sohbat meñ itnā ḳhush huuñ ki hañs rahā huuñ

tumhārī furqat meñ ḳhuuñ bahā.ūñgā dekh lenā

vo ik samundar udāsiyoñ kā jo ruuh meñ hai

maiñ us samundar meñ Duub jā.ūñgā dekh lenā

tumhārī chaukhaT pe jaan de kar amar rahūñgā

tumhārī nabzoñ meñ thartharā.ūñgā dekh lenā

vo ḳhat tumhāre jo jaan se bhī azīz-tar haiñ

maiñ ek ik kar ke sab jalā.ūñgā dekh lenā

ik us kā ġham hī mirā muqaddar koī hai 'nāsir'

abhī to maiñ kitne ġham uThā.ūñgā dekh lenā

tumhaare jaane ka gham manaunga dekh lena

main hijr-e-sahra mein KHak uDaunga dekh lena

mera ye dawa hai muddaton tak main ban ke aansu

tumhaari aankhon mein jhilmilaunga dekh lena

wo sari ghazlen jo bas tumhaare liye likhi thin

wo ab main har shaKHs ko sunaunga dekh lena

ye tum jo mujh se zara si baaton pe ruThte ho

main sari duniya se ruTh jaunga dekh lena

tumhaari sohbat mein itna KHush hun ki hans raha hun

tumhaari furqat mein KHun bahaunga dekh lena

wo ek samundar udasiyon ka jo ruh mein hai

main us samundar mein Dub jaunga dekh lena

tumhaari chaukhaT pe jaan de kar amar rahunga

tumhaari nabzon mein thartharaunga dekh lena

wo KHat tumhaare jo jaan se bhi aziz-tar hain

main ek ek kar ke sab jalaunga dekh lena

ek us ka gham hi mera muqaddar koi hai 'nasir'

abhi to main kitne gham uThaunga dekh lena