tumhaare liye muskuraati sahar hai

tumhāre liye muskurātī sahar hai

hamāre liye raat kā ye nagar hai

akele yahāñ baiTh kar kyā kareñge

bulāyā hai jis ne hameñ vo kidhar hai

pareshāñ huuñ kis kis kā surma banā.ūñ

yahāñ to har ik kī usī par nazar hai

ujālā haiñ ruḳhsār jaadū haiñ āñkheñ

ba-zāhir vo sab kī tarah ik bashar hai

vo jis ne hamesha hameñ dukh diye haiñ

tamāsha to ye hai vahī chārāgar hai

nikal kar vahāñ se kahīñ dil na Thahrā

bichāra abhī tak yahāñ dar-ba-dar hai

kisī din ye patthar bhī bāteñ karegā

mohabbat kī nazroñ meñ itnā asar hai

jo palkoñ se gir jaa.e aañsū kā qatra

jo palkoñ meñ rah jā.egā vo guhar hai

vo zillat vo ḳhvārī bhī us ke sabab thī

mohabbat kā sehra bhī us dil ke sar hai

koī aa rahā hai koī jā rahā hai

samajhte haiñ duniyā ko ḳhāla kā ghar hai

na koī payām us kī jānib se aayā

na miltā kahīñ ab mirā nāma-bar hai

tumhaare liye muskuraati sahar hai

hamare liye raat ka ye nagar hai

akele yahan baiTh kar kya karenge

bulaya hai jis ne hamein wo kidhar hai

pareshan hun kis kis ka surma banaun

yahan to har ek ki usi par nazar hai

ujala hain ruKHsar jadu hain aankhen

ba-zahir wo sab ki tarah ek bashar hai

wo jis ne hamesha hamein dukh diye hain

tamasha to ye hai wahi chaaragar hai

nikal kar wahan se kahin dil na Thahra

bichaara abhi tak yahan dar-ba-dar hai

kisi din ye patthar bhi baaten karega

mohabbat ki nazron mein itna asar hai

jo palkon se gir jae aansu ka qatra

jo palkon mein rah jaega wo guhar hai

wo zillat wo KHwari bhi us ke sabab thi

mohabbat ka sehra bhi us dil ke sar hai

koi aa raha hai koi ja raha hai

samajhte hain duniya ko KHala ka ghar hai

na koi payam us ki jaanib se aaya

na milta kahin ab mera nama-bar hai