tumhaare qad se hain qaem qayamaten kya kya

tumhāre qad se haiñ qaa.em qayāmateñ kyā kyā

uThī haiñ baiThe biThā.e ye āfateñ kyā kyā

laboñ pe jaan kā aanā ye ḳhvāb kā jaanā

ḳhayāl-e-lab meñ haiñ terī halāvateñ kyā kyā

dil apnā tum ko diyā phir rakhe vafā kī umiid

bayāñ apnī karūñ maiñ himāqateñ kyā kyā

zamīñ meñ sharm se us qad kī gaḌ gayā hai sarv

huī haiñ us ko na hāsil nadāmateñ kyā kyā

phirā 'adam se koī ab talak na uktā kar

ḳhudā hī jaane vahāñ haiñ farāġhateñ kyā kyā

tū be-nasīb hai nāseh tujhe kahūñ kyā maiñ

ki rañj-e-ishq meñ hotī haiñ rāhateñ kyā kyā

gale se lagte hī jitne gile the bhuul ga.e

vagarna yaad thiiñ mujh ko shikāyateñ kyā kyā

mujhe hai girya maiñ machlā.e par hañsī aatī

kahe hai sun ke tū jab merī hālateñ kyā kyā

kahe hai mujh ko mirā sho.ala-rū ba-sad tashnī.a

bayān terī karūñ maiñ sharārteñ kyā kyā

kahūñ jo aa to phire mere gird pahroñ talak

jo bolūñ jā to jatā.e naqāhateñ kyā kyā

Darā.e aah se gar aah sun ke maiñ na Darūñ

dikhā.e ashk kī apnī sarāyateñ kyā kyā

jo zulf dekhī to chimTī mujhe balā kī tarah

nasīb apne kī batlā.eñ shāmateñ kyā kyā

jo kholūñ band-e-qabā phir khule hai terī zabāñ

nikāltā hai tū is meñ qabāhateñ kyā kyā

jo surma duuñ huuñ to ik tūtiyā sā bāñdhe hai

kahūñ jo baat banā.e hikāyateñ kyā kyā

marīz-e-'ishq tū ho aur mujh ko rog lage

raheñ haiñ ab kī zamāne meñ chāhateñ kyā kyā

jo zikr kal kā kiyā maiñ ne muñh chhupā ke kahā

tujhe bhī yaad haiñ 'ehsāñ' kināyateñ kyā kyā

tumhaare qad se hain qaem qayamaten kya kya

uThi hain baiThe biThae ye aafaten kya kya

labon pe jaan ka aana ye KHwab ka jaana

KHayal-e-lab mein hain teri halawaten kya kya

dil apna tum ko diya phir rakhe wafa ki umid

bayan apni karun main himaqaten kya kya

zamin mein sharm se us qad ki gaD gaya hai sarw

hui hain us ko na hasil nadamaten kya kya

phira 'adam se koi ab talak na ukta kar

KHuda hi jaane wahan hain faraghaten kya kya

tu be-nasib hai naseh tujhe kahun kya main

ki ranj-e-ishq mein hoti hain rahaten kya kya

gale se lagte hi jitne gile the bhul gae

wagarna yaad thin mujh ko shikayaten kya kya

mujhe hai girya main machlae par hansi aati

kahe hai sun ke tu jab meri haalaten kya kya

kahe hai mujh ko mera shoala-ru ba-sad tashnia

bayan teri karun main shararten kya kya

kahun jo aa to phire mere gird pahron talak

jo bolun ja to jatae naqahaten kya kya

Darae aah se gar aah sun ke main na Darun

dikhae ashk ki apni sarayaten kya kya

jo zulf dekhi to chimTi mujhe bala ki tarah

nasib apne ki batlaen shamaten kya kya

jo kholun band-e-qaba phir khule hai teri zaban

nikalta hai tu is mein qabahaten kya kya

jo surma dun hun to ek tutiya sa bandhe hai

kahun jo baat banae hikayaten kya kya

mariz-e-'ishq tu ho aur mujh ko rog lage

rahen hain ab ki zamane mein chahaten kya kya

jo zikr kal ka kiya main ne munh chhupa ke kaha

tujhe bhi yaad hain 'ehsan' kinayaten kya kya