tumhaari tariKH koi badle use miTae to sar uThao

tumhārī tārīḳh koī badle use miTā.e to sar uThāo

agar sharāfat na kaam aa.e na haq dilā.e to sar uThāo

kahīñ ujālā kahīñ añdherā baġhair sāzish nahīñ hai mumkin

charāġh jab raushnī barābar na baañT paa.e to sar uThāo

kisī ke hisse kī bārisheñ jab kisī kī fasloñ ko lahlahā.eñ

aur us kī sāzish kā shak havā par agar na jaa.e to sar uThāo

agar ho kāñToñ kī qadr-o-qīmat kisī chaman meñ guloñ se baḌh kar

aur us kā maalī dalīl de us ko haq batā.e to sar uThāo

qalam uThāo nazar milāo tum ab lab-e-ehtijāj kholo

muḳhālifat se munāfiqat ko koī bulā.e to sar uThāo

kisī kī bātoñ meñ tum na aao na sar uThāo na sar jhukāv

agar tumhārā zamīr jaage tumheñ jagā.e to sar uThāo

ye kyā ki har vaqt jī-huzūrī meñ sar jhukā.e hue ho ahyā

agar baġhāvat kā par tumhārā bhī phaḌphaḌā.e to sar uThāo

tumhaari tariKH koi badle use miTae to sar uThao

agar sharafat na kaam aae na haq dilae to sar uThao

kahin ujala kahin andhera baghair sazish nahin hai mumkin

charagh jab raushni barabar na banT pae to sar uThao

kisi ke hisse ki barishen jab kisi ki faslon ko lahlahaen

aur us ki sazish ka shak hawa par agar na jae to sar uThao

agar ho kanTon ki qadr-o-qimat kisi chaman mein gulon se baDh kar

aur us ka mali dalil de us ko haq batae to sar uThao

qalam uThao nazar milao tum ab lab-e-ehtijaj kholo

muKHalifat se munafiqat ko koi bulae to sar uThao

kisi ki baaton mein tum na aao na sar uThao na sar jhukaw

agar tumhaara zamir jage tumhein jagae to sar uThao

ye kya ki har waqt ji-huzuri mein sar jhukae hue ho ahya

agar baghawat ka par tumhaara bhi phaDphaDae to sar uThao