tumhaari yaad mein duniya ko hun bhulae hue

tumhārī yaad meñ duniyā ko huuñ bhulā.e hue

tumhāre dard ko siine se huuñ lagā.e hue

ajiib soz se labrez haiñ mire naġhme

ki sāz-e-dil hai mohabbat kī choT khaa.e hue

jo tujh se kuchh bhī na milne pe ḳhush haiñ ai saaqī

kuchh aise rind bhī haiñ mai-kade meñ aa.e hue

tumhāre ek tabassum ne dil ko luuT liyā

rahe laboñ pe hī shikve laboñ pe aa.e hue

'asar' bhī rāh-rav-e-dasht-e-zindagānī hai

pahāḌ ġham kā dil-e-zār par uThā.e hue

tumhaari yaad mein duniya ko hun bhulae hue

tumhaare dard ko sine se hun lagae hue

ajib soz se labrez hain mere naghme

ki saz-e-dil hai mohabbat ki choT khae hue

jo tujh se kuchh bhi na milne pe KHush hain ai saqi

kuchh aise rind bhi hain mai-kade mein aae hue

tumhaare ek tabassum ne dil ko luT liya

rahe labon pe hi shikwe labon pe aae hue

'asar' bhi rah-raw-e-dasht-e-zindagani hai

pahaD gham ka dil-e-zar par uThae hue