tumhein ab is se ziyaada saza nahin dunga

tumheñ ab is se ziyāda sazā nahīñ dūñgā

duā.eñ dūñgā magar bad-du'ā nahīñ dūñgā

tirī taraf se laḌūñgā maiñ terī har ik jañg

rahūñgā saath magar hausla nahīñ dūñgā

tirī zabān pe mauqūf mere haath kā lams

nivāla dūñgā magar zā.iqa nahīñ dūñgā

maiñ pahle bose se nā-āshnā rakhūñgā tumheñ

phir is ke baa'd tumheñ dūsrā nahīñ dūñgā

phir ek baar guzar jaao mere uupar se

maiñ is ke baa'd tumheñ rāsta nahīñ dūñgā

ki tū talāsh kare aur maiñ tujh ko mil jā.ūñ

maiñ terī aañkh ko itnī sazā nahīñ dūñgā

bhagā.e rakkhūñgā apnī adālatoñ meñ tumheñ

tamām 'umr tumheñ faisla nahīñ dūñgā

maiñ us ke saath huuñ jo uTh ke phir khaḌā ho jaa.e

maiñ tere shahr ko ab zalzala nahīñ dūñgā

tirī anā ke liye sirf ye sazā hai bahut

tū jā rahā hai to tujh ko sadā nahīñ dūñgā

ki ab kī baar 'liyāqat' huā huā so huā

maiñ us ke haath meñ ab aa.inā nahīñ dūñgā

tumhein ab is se ziyaada saza nahin dunga

duaen dunga magar bad-du'a nahin dunga

teri taraf se laDunga main teri har ek jang

rahunga sath magar hausla nahin dunga

teri zaban pe mauquf mere hath ka lams

niwala dunga magar zaiqa nahin dunga

main pahle bose se na-ashna rakhunga tumhein

phir is ke ba'd tumhein dusra nahin dunga

phir ek bar guzar jao mere upar se

main is ke ba'd tumhein rasta nahin dunga

ki tu talash kare aur main tujh ko mil jaun

main teri aankh ko itni saza nahin dunga

bhagae rakkhunga apni adalaton mein tumhein

tamam 'umr tumhein faisla nahin dunga

main us ke sath hun jo uTh ke phir khaDa ho jae

main tere shahr ko ab zalzala nahin dunga

teri ana ke liye sirf ye saza hai bahut

tu ja raha hai to tujh ko sada nahin dunga

ki ab ki bar 'liyaqat' hua hua so hua

main us ke hath mein ab aaina nahin dunga