tumhin ek nahin jaan-setan aur bhi hain

tumhīñ ik nahīñ jāñ-setāñ aur bhī haiñ

bahut hādsāt-e-jahāñ aur bhī haiñ

hasīñ aur bhī haiñ javāñ aur bhī haiñ

ġhazālān-e-abrū-kamāñ aur bhī haiñ

sabhī ko mohabbat meñ hote haiñ sadme

abhī kyā abhī imtihāñ aur bhī haiñ

chalo dhuum se jashn-e-mātam manā.eñ

hameñ ik nahīñ nauha-ḳhvāñ aur bhī haiñ

nahīñ ḳhatm kuchh āsmāñ par ḳhudā.ī

mire haal par mehrbāñ aur bhī haiñ

naqāb us ne ruḳh se uThā.ī to lekin

hijābāt kuchh darmiyāñ aur bhī haiñ

fareb-e-karam ik to un kā hai is par

sitam merī ḳhush-fahmiyāñ aur bhī haiñ

vafā un se apnī jatāne ga.e the

magar ab to vo bad-gumāñ aur bhī haiñ

nahīñ sabr hī kī kamī tujh meñ 'fazlī'

mirī jaan kuchh ḳhāmiyāñ aur bhī haiñ

tumhin ek nahin jaan-setan aur bhi hain

bahut hadsat-e-jahan aur bhi hain

hasin aur bhi hain jawan aur bhi hain

ghazalan-e-abru-kaman aur bhi hain

sabhi ko mohabbat mein hote hain sadme

abhi kya abhi imtihan aur bhi hain

chalo dhum se jashn-e-matam manaen

hamein ek nahin nauha-KHwan aur bhi hain

nahin KHatm kuchh aasman par KHudai

mere haal par mehrban aur bhi hain

naqab us ne ruKH se uThai to lekin

hijabaat kuchh darmiyan aur bhi hain

fareb-e-karam ek to un ka hai is par

sitam meri KHush-fahmiyan aur bhi hain

wafa un se apni jatane gae the

magar ab to wo bad-guman aur bhi hain

nahin sabr hi ki kami tujh mein 'fazli'

meri jaan kuchh KHamiyan aur bhi hain