tu farishta na hua to na pasheman hona

tū farishta na huā to na pashemāñ honā

hai baḌī shai yahāñ insāñ kā bhī insāñ honā

maanā mushkil hai magar ab ye hunar sīkheñge

kyā ḳhabar thī ki paḌegā hameñ āsāñ honā

kyā zarūrī hai taqābul kisī kā shīshe se

zaat meñ ho na agar aks pe nāzāñ honā

tañg-jānī hai yuuñ bhī ḳhāl-o-ḳhad-o-paikar meñ

dam nahīñ ghoT de ehsās-e-farāvāñ honā

khel pardoñ kā hai saarā sar-e-mimbar us kā

vo ayaañ honā kabhī aur kabhī pinhāñ honā

ham ujāloñ ke jale haiñ so añdheroñ meñ hai

raas aa.egā nahīñ ham ko charāġhāñ honā

zulm hai bāñdhnā ham ko yuuñ had-e-imkāñ meñ

aur ḳhud is kā ba.īd-e-had-e-imkāñ honā

tu farishta na hua to na pasheman hona

hai baDi shai yahan insan ka bhi insan hona

mana mushkil hai magar ab ye hunar sikhenge

kya KHabar thi ki paDega hamein aasan hona

kya zaruri hai taqabul kisi ka shishe se

zat mein ho na agar aks pe nazan hona

tang-jaani hai yun bhi KHal-o-KHad-o-paikar mein

dam nahin ghoT de ehsas-e-farawan hona

khel pardon ka hai sara sar-e-mimbar us ka

wo ayan hona kabhi aur kabhi pinhan hona

hum ujalon ke jale hain so andheron mein hai

ras aaega nahin hum ko charaghan hona

zulm hai bandhna hum ko yun had-e-imkan mein

aur KHud is ka baid-e-had-e-imkan hona