tu ghazal ban ke utar baat mukammal ho jae

tū ġhazal ban ke utar baat mukammal ho jaa.e

muntazir dil kī munājāt mukammal ho jaa.e

umr bhar milte rahe phir bhī na milne paa.e

is tarah mil ki mulāqāt mukammal ho jaa.e

din meñ bikhrā huuñ bahut raat sameTegī mujhe

tū bhī aa jā to mirī zaat mukammal ho jaa.e

niind ban kar mirī āñkhoñ se mire ḳhuuñ meñ utar

rat-jagā ḳhatm ho aur raat mukammal ho jaa.e

maiñ sarāpā huuñ duā tū mirā maqsūd-e-duā

baat yuuñ kar ki mirī baat mukammal ho jaa.e

abr āñkhoñ se uThe haiñ tirā dāman mil jaa.e

hukm ho terā to barsāt mukammal ho jaa.e

tire siine se mire siine meñ āyāt utreñ

sūra-e-kashf-o-karāmāt mukammal ho jaa.e

tere lab mohr lagā deñ to ye qissa ho tamām

daftar-e-tūl-e-shikāyāt mukammal ho jaa.e

tujh ko paa.e to 'vahīd' apne ḳhudā ko pā le

kāvish-e-ma.arfat-e-zāt mukammal ho jaa.e

tu ghazal ban ke utar baat mukammal ho jae

muntazir dil ki munajat mukammal ho jae

umr bhar milte rahe phir bhi na milne pae

is tarah mil ki mulaqat mukammal ho jae

din mein bikhra hun bahut raat sameTegi mujhe

tu bhi aa ja to meri zat mukammal ho jae

nind ban kar meri aankhon se mere KHun mein utar

rat-jaga KHatm ho aur raat mukammal ho jae

main sarapa hun dua tu mera maqsud-e-dua

baat yun kar ki meri baat mukammal ho jae

abr aankhon se uThe hain tera daman mil jae

hukm ho tera to barsat mukammal ho jae

tere sine se mere sine mein aayat utren

sura-e-kashf-o-karamat mukammal ho jae

tere lab mohr laga den to ye qissa ho tamam

daftar-e-tul-e-shikayat mukammal ho jae

tujh ko pae to 'wahid' apne KHuda ko pa le

kawish-e-marfat-e-zat mukammal ho jae