تو جانتا ہے صرف سیاست کے داؤ پیچ

تو جانتا ہے صرف سیاست کے داؤ پیچ

لیکن الگ ہیں اس سے محبت کے داؤ پیچ

مجھ کو بچا کے مجھ پہ نہ احسان دھر کہ میں

خود بھی تو جانتا ہوں حفاظت کے داؤ پیچ

تم کیسے بچ سکو گے بھلا اس کے دام سے

اس کے تو داؤ پیچ ہیں شدت کے داؤ پیچ

نکلیں گے لاکھ کام اسی ایک راہ سے

کھیلوں جو زندگی میں مروت کے داؤ پیچ

اس بار تو وکیل بھی ایسا چنوں گا میں

جو خوب جانتا ہو وکالت کے داؤ پیچ

اب بھی عوام ان کو نہ سمجھے ظفرؔ تو پھر

سمجھیں گے کب بھلا یہ حکومت کے داؤ پیچ