tu ne kamal kaam ye nadan kar diya

tū ne kamāl kaam ye nādān kar diyā

ghar meñ mujhe ḳhud apnā hī mehmān kar diyā

bas ik zarā sī bhuul huī iḳhtilāf kī

be-daḳhl kar ke taḳht se darbān kar diyā

ai bad-nasīb merā yaqīñ mujh se chhīn kar

tujh ko ye zo.am hai mirā nuqsān kar diyā

buzdil thā maiñ jo kar na sakā ḳhud ye intizām

sad-shukr tum ne maut kā sāmān kar diyā

haa.e lagā ke aag charāġhāñ ke shauq meñ

hākim ne saare shahr ko vīrān kar diyā

qad se mirā savāl baḌā thā so is liye

mohsin ko apne dāḳhil-e-zindān kar diyā

ḳhairāt de ke guzrā hai jo mere paas se

us ne kabhī mujhe bhī thā bhagvān kar diyā

yuuñ to maiñ mohtasib rahā apnā tamām umr

tum ne magar batā ke ye hairān kar diyā

'safdar' qunūtiyat kā ye e.azāz jo milā

e.azāz dene vaale ne ehsān kar diyā

tu ne kamal kaam ye nadan kar diya

ghar mein mujhe KHud apna hi mehman kar diya

bas ek zara si bhul hui iKHtilaf ki

be-daKHl kar ke taKHt se darban kar diya

ai bad-nasib mera yaqin mujh se chhin kar

tujh ko ye zoam hai mera nuqsan kar diya

buzdil tha main jo kar na saka KHud ye intizam

sad-shukr tum ne maut ka saman kar diya

hae laga ke aag charaghan ke shauq mein

hakim ne sare shahr ko viran kar diya

qad se mera sawal baDa tha so is liye

mohsin ko apne daKHil-e-zindan kar diya

KHairaat de ke guzra hai jo mere pas se

us ne kabhi mujhe bhi tha bhagwan kar diya

yun to main mohtasib raha apna tamam umr

tum ne magar bata ke ye hairan kar diya

'safdar' qunutiyat ka ye eazaz jo mila

eazaz dene wale ne ehsan kar diya