tu sath hai magar kahin tera pata nahin

tū saath hai magar kahīñ terā patā nahīñ

shāḳhoñ pe duur tak koī pattā harā nahīñ

ḳhāmoshiyāñ bharī haiñ fazāoñ meñ in dinoñ

ham ne bhī mausamoñ se idhar kuchh kahā nahīñ

tū ne zabāñ na kholī suḳhan maiñ ne chun liye

tū ne vo paḌh liyā jise maiñ ne likhā nahīñ

ye kaun sī jagah hai ye bastī hai kaun sī

koī bhī is jahān meñ tere sivā nahīñ

chaliye bahut qarīb se sab dekhnā huā

apne gumāñ se haT ke kahīñ kuchh huā nahīñ

chhoḌā hai jaane kis ne mujhe bāl-o-par ke saath

ye kin bulandiyoñ pe jahāñ par havā nahīñ

rañg-e-talab hai kaun sī manzil meñ kyā kaheñ

āñkhoñ meñ mudda.ā nahīñ lab par sadā nahīñ

pīchhe tire ai rāhat-e-jān kuchh na pūchhiyo

kyā kyā huā nahīñ yahāñ kyā kuchh huā nahīñ

tu sath hai magar kahin tera pata nahin

shaKHon pe dur tak koi patta hara nahin

KHamoshiyan bhari hain fazaon mein in dinon

hum ne bhi mausamon se idhar kuchh kaha nahin

tu ne zaban na kholi suKHan main ne chun liye

tu ne wo paDh liya jise main ne likha nahin

ye kaun si jagah hai ye basti hai kaun si

koi bhi is jahan mein tere siwa nahin

chaliye bahut qarib se sab dekhna hua

apne guman se haT ke kahin kuchh hua nahin

chhoDa hai jaane kis ne mujhe baal-o-par ke sath

ye kin bulandiyon pe jahan par hawa nahin

rang-e-talab hai kaun si manzil mein kya kahen

aankhon mein muddaa nahin lab par sada nahin

pichhe tere ai rahat-e-jaan kuchh na puchhiyo

kya kya hua nahin yahan kya kuchh hua nahin