tu suKHanwar hai to kar haq se wafa harf-ba-harf

tū suḳhanvar hai to kar haq se vafā harf-ba-harf

farz shā'ir kā sadāqat se nibhā harf-ba-harf

DhūñD aflāk na.e aur zamīneñ bhī na.ī

ho ġhazal kā tirī har she'r nayā harf-ba-harf

naqsh ko lafz meñ manzar ko ibārat meñ badal

phir jo dekhā tirī āñkhoñ ne dikhā harf-ba-harf

lailā majnūñ ke fasāne ke bahāne hī sahī

apnī rūdād zamāne ko sunā harf-ba-harf

rang-o-alfāz meñ jur.at kahāñ jo khīñcheñ sanam

hū-ba-hū terī chhaTā terī adā harf-ba-harf

she'r meñ yuuñ hī nahīñ rang-e-taġhazzul aayā

ḳhūn-e-dil se ise sīñchā hai gayā harf-ba-harf

ham nahīñ vo jo tarannum ko suḳhan kahte haiñ

ham ne har she'r meñ mā'nī hai bharā harf-ba-harf

shaiḳh achchhā huā tū hāfiz-e-qur.ān huā

ab ik aayat pe amal kar ke dikhā harf-ba-harf

kar buland apnī sadā haq meñ ġharīboñ ke 'sadā'

aur utar apne taḳhallus pe kharā harf-ba-harf

tu suKHanwar hai to kar haq se wafa harf-ba-harf

farz sha'ir ka sadaqat se nibha harf-ba-harf

DhunD aflak nae aur zaminen bhi nai

ho ghazal ka teri har she'r naya harf-ba-harf

naqsh ko lafz mein manzar ko ibarat mein badal

phir jo dekha teri aankhon ne dikha harf-ba-harf

laila majnun ke fasane ke bahane hi sahi

apni rudad zamane ko suna harf-ba-harf

rang-o-alfaz mein jurat kahan jo khinchen sanam

hu-ba-hu teri chhaTa teri ada harf-ba-harf

she'r mein yun hi nahin rang-e-taghazzul aaya

KHun-e-dil se ise sincha hai gaya harf-ba-harf

hum nahin wo jo tarannum ko suKHan kahte hain

hum ne har she'r mein ma'ni hai bhara harf-ba-harf

shaiKH achchha hua tu hafiz-e-quran hua

ab ek aayat pe amal kar ke dikha harf-ba-harf

kar buland apni sada haq mein gharibon ke 'sada'

aur utar apne taKHallus pe khara harf-ba-harf