tufan ke Dar se rang uDa bhi isi ka tha

tūfāñ ke Dar se rañg uḌā bhī isī kā thā

lekin safīna paar lagā bhī usī kā thā

jo hoñT sil ga.e vo sanā-ḳhvāñ usī ke the

jo mar gayā vo harf-e-duā bhī usī kā thā

utrī thī us ke ghar meñ mah-o-mahr kī barāt

aur merā TimTimātā diyā bhī usī kā thā

mīnār-e-jāñ meñ us kī sadā gūñjtī rahī

lauh-e-jabīñ pe naam likhā bhī usī kā thā

thī us ke aks-e-ruḳh se shafaq-rañg zindagī

mere lahū meñ rañg-e-hinā bhī usī kā thā

ḳhāmoshiyoñ pe pahle kabhī us kā bas na thā

phir yuuñ huā ki shahr-e-sadā bhī usī kā thā

pahle to chand log taraf-dār the mire

phir vo bhī vaqt thā ki ḳhudā bhī usī kā thā

tufan ke Dar se rang uDa bhi isi ka tha

lekin safina par laga bhi usi ka tha

jo honT sil gae wo sana-KHwan usi ke the

jo mar gaya wo harf-e-dua bhi usi ka tha

utri thi us ke ghar mein mah-o-mahr ki baraat

aur mera TimTimata diya bhi usi ka tha

minar-e-jaan mein us ki sada gunjti rahi

lauh-e-jabin pe nam likha bhi usi ka tha

thi us ke aks-e-ruKH se shafaq-rang zindagi

mere lahu mein rang-e-hina bhi usi ka tha

KHamoshiyon pe pahle kabhi us ka bas na tha

phir yun hua ki shahr-e-sada bhi usi ka tha

pahle to chand log taraf-dar the mere

phir wo bhi waqt tha ki KHuda bhi usi ka tha