TuTe hue KHwabon ke talabgar bhi aae

TuuTe hue ḳhvāboñ ke talabgār bhī aa.e

ai jins-e-girāñ tere ḳharīdār bhī aa.e

muddat huī sunte hue tamhīd-e-tilismāt

ab qisse meñ aage koī kirdār bhī aa.e

kyā ḳhatm na hogī kabhī sahrā kī hukūmat

raste meñ kahīñ to dar-o-dīvār bhī aa.e

ab jis ke asar meñ hai ye vīrān havelī

vo saaya kabhī to pas-e-dīvār bhī aa.e

phir shahr meñ ayyām-e-guzishta kī uḌī raakh

phir zad meñ ka.ī jubba-o-dastār bhī aa.e

pahle to sabhī tere sarāpā meñ hue gum

phir zikr meñ aage tire atvār bhī aa.e

TuTe hue KHwabon ke talabgar bhi aae

ai jins-e-giran tere KHaridar bhi aae

muddat hui sunte hue tamhid-e-tilismat

ab qisse mein aage koi kirdar bhi aae

kya KHatm na hogi kabhi sahra ki hukumat

raste mein kahin to dar-o-diwar bhi aae

ab jis ke asar mein hai ye viran haweli

wo saya kabhi to pas-e-diwar bhi aae

phir shahr mein ayyam-e-guzishta ki uDi rakh

phir zad mein kai jubba-o-dastar bhi aae

pahle to sabhi tere sarapa mein hue gum

phir zikr mein aage tere atwar bhi aae