uDa sakta nahin koi mere andaz-e-shewan ko

uḌā saktā nahīñ koī mire andāz-e-shevan ko

ba-mushkil kuchh sikhāyā hai navā-sanjān-e-gulshan ko

garebāñ chaak karne kā sabab vahshī ne farmāyā

ki us ke taar le kar maiñ siyūñgā chāk-e-dāman ko

bahār aate hī baTtī haiñ ye chīzeñ qaid-ḳhānoñ meñ

salāsil haath ko paañv ko beḌī tauq gardan ko

jhaḌī aisī lagā dī hai mire ashkoñ kī bārish ne

dabā rakkhā hai bhādoñ ko bhulā rakkhā hai sāvan ko

dil-e-marhūm kī mayyat ijāzat do to rakh deñ ham

tire talve-barābar hī zamīñ kaafī hai madfan ko

ijāzat do to saarī anjuman ke dil hilā duuñ maiñ

samajh rakkhā hai tum ne hech tāsīrāt-e-shevan ko

sulūk-e-pīr-e-mai-ḳhāna kī ai saaqī talāfī kyā

ba-juz is ke duā.eñ do use phailā ke dāman ko

uDa sakta nahin koi mere andaz-e-shewan ko

ba-mushkil kuchh sikhaya hai nawa-sanjaan-e-gulshan ko

gareban chaak karne ka sabab wahshi ne farmaya

ki us ke tar le kar main siyunga chaak-e-daman ko

bahaar aate hi baTti hain ye chizen qaid-KHanon mein

salasil hath ko panw ko beDi tauq gardan ko

jhaDi aisi laga di hai mere ashkon ki barish ne

daba rakkha hai bhadon ko bhula rakkha hai sawan ko

dil-e-marhum ki mayyat ijazat do to rakh den hum

tere talwe-barabar hi zamin kafi hai madfan ko

ijazat do to sari anjuman ke dil hila dun main

samajh rakkha hai tum ne hech tasiraat-e-shewan ko

suluk-e-pir-e-mai-KHana ki ai saqi talafi kya

ba-juz is ke duaen do use phaila ke daman ko