udas aankhon mein ratjagon ka jamawDa hai

udaas āñkhoñ meñ ratjagoñ kā jamāvḌā hai

hamārī palkoñ pe āñsuoñ kā jamāvḌā hai

maiñ kis tarah se pahuñch sakūñgā tirī galī tak

tamām rāhoñ meñ rahzanoñ kā jamāvḌā hai

ye shahr jis meñ mohabbatoñ kā rivāj paayā

yahāñ to har samt nafratoñ kā jamāvḌā hai

kabhī darīche se jhāñk kar dekh lo galī meñ

tumhāre dar par to 'āshiqoñ kā jamāvḌā hai

kisī murabbe meñ ik musallas phañsā huā hai

kisī musallas meñ dā.eroñ kā jamāvḌā hai

ġhamoñ ke Dar se maiñ bhāgtā phir rahā huuñ 'sāgar'

mire ta'āqub meñ dushmanoñ kā jamāvḌā hai

udas aankhon mein ratjagon ka jamawDa hai

hamari palkon pe aansuon ka jamawDa hai

main kis tarah se pahunch sakunga teri gali tak

tamam rahon mein rahzanon ka jamawDa hai

ye shahr jis mein mohabbaton ka riwaj paya

yahan to har samt nafraton ka jamawDa hai

kabhi dariche se jhank kar dekh lo gali mein

tumhaare dar par to 'ashiqon ka jamawDa hai

kisi murabbe mein ek musallas phansa hua hai

kisi musallas mein daeron ka jamawDa hai

ghamon ke Dar se main bhagta phir raha hun 'sagar'

mere ta'aqub mein dushmanon ka jamawDa hai