uDte lamhon ke bhanwar mein koi phansta hi nahin

uḌte lamhoñ ke bhañvar meñ koī phañstā hī nahīñ

is samundar meñ koī tairne vaalā hī nahīñ

sālhā-sāl se vīrān haiñ dil kī galiyāñ

ek muddat se koī is taraf aayā hī nahīñ

aañkh ke ġhaar meñ haiñ saikḌoñ saḌtī lāsheñ

jhāñk kar un meñ kisī ne kabhī dekhā hī nahīñ

duur tak phail ga.ī TūTte lamhoñ kī ḳhalīj

vaqt kā saaya mire sar se utartā hī nahīñ

silsila rone kā sadiyoñ se chalā aatā hai

koī aañsū mirī palkoñ pe Thahartā hī nahīñ

jalte ākāsh kī Dhalvān pe sūraj kā vajūd

ik pighaltā huā laavā hai ki bujhtā hī nahīñ

uDte lamhon ke bhanwar mein koi phansta hi nahin

is samundar mein koi tairne wala hi nahin

salha-sal se viran hain dil ki galiyan

ek muddat se koi is taraf aaya hi nahin

aankh ke ghaar mein hain saikDon saDti lashen

jhank kar un mein kisi ne kabhi dekha hi nahin

dur tak phail gai TuTte lamhon ki KHalij

waqt ka saya mere sar se utarta hi nahin

silsila rone ka sadiyon se chala aata hai

koi aansu meri palkon pe Thaharta hi nahin

jalte aakash ki Dhalwan pe suraj ka wajud

ek pighalta hua lawa hai ki bujhta hi nahin