ujale ho gae zinda meri ghamgin aankhon mein

ujāle ho ga.e zinda mirī ġhamgīn āñkhoñ meñ

tum aa.e to sadā ko bas ga.ī taskīn āñkhoñ meñ

lagāyā kājal-e-ishq us ne jab shauqīn āñkhoñ meñ

simaT aa.iiñ sabhī rañgīniyāñ rañgīn āñkhoñ meñ

mahak uThtī haiñ jism-o-jāñ kī afsurda fazā.eñ bhī

jab aatā hai piro kar vo gul-e-nasrīn āñkhoñ meñ

jo in meñ Duub jaatā hai ubhar kar phir nahīñ aatā

samundar kar rakhe haiñ band kyā namkīn āñkhoñ meñ

badan sone kā rakhtā hai vo dilbar dekhne us ko

lagā kar surma-e-zarrīñ chalo miskīn āñkhoñ meñ

uḌāneñ bharne lagtī haiñ ḳhayāloñ kī abābīleñ

jab āñkheñ Dāltā huuñ maiñ tirī shāhīn āñkhoñ meñ

ka.ī dil pheñk dil ke ābgīne toḌ kar bhāge

qayāmat jab bapā hone lagī shauqīn āñkhoñ meñ

hamāre jazba-e-dil ko sarāho ai qalam-kāro

fasāne kar diye ham ne raqam do tiin āñkhoñ meñ

lahad aisī kisī ne bhī na dekhī hogī ai 'shībān'

hazāroñ hasratoñ kī ho ga.ī tadfīn āñkhoñ meñ

ujale ho gae zinda meri ghamgin aankhon mein

tum aae to sada ko bas gai taskin aankhon mein

lagaya kajal-e-ishq us ne jab shauqin aankhon mein

simaT aain sabhi ranginiyan rangin aankhon mein

mahak uThti hain jism-o-jaan ki afsurda fazaen bhi

jab aata hai piro kar wo gul-e-nasrin aankhon mein

jo in mein Dub jata hai ubhar kar phir nahin aata

samundar kar rakhe hain band kya namkin aankhon mein

badan sone ka rakhta hai wo dilbar dekhne us ko

laga kar surma-e-zarrin chalo miskin aankhon mein

uDanen bharne lagti hain KHayalon ki ababilen

jab aankhen Dalta hun main teri shahin aankhon mein

kai dil phenk dil ke aabgine toD kar bhage

qayamat jab bapa hone lagi shauqin aankhon mein

hamare jazba-e-dil ko saraho ai qalam-karo

fasane kar diye hum ne raqam do tin aankhon mein

lahad aisi kisi ne bhi na dekhi hogi ai 'shiban'

hazaron hasraton ki ho gai tadfin aankhon mein