ulfat ke jab se aam kai raaz ho gae

ulfat ke jab se aam ka.ī raaz ho ga.e

badle hue jahān ke andāz ho ga.e

hālāñki roz aate the marzī se apnī vo

ik din bulāyā ham ne to nārāz ho ga.e

pal pal badalte rañg haiñ insān kis kis tarah

samjhā thā jin ko dost daġhābāz ho ga.e

jin kā koī atā na patā thā kisī ko bhī

chiḌiyā huī javāñ to ka.ī baaz ho ga.e

vo raqs thā ki ḳhuuñ se zamīñ laal ho ga.ī

ḳhāmosh jitne bhī the vahāñ saaz ho ga.e

ānand kis tarah se badaltā hai vaqt bhī

buzdil jo kal talak the vo jāñ-bāz ho ga.e

ulfat ke jab se aam kai raaz ho gae

badle hue jahan ke andaz ho gae

haalanki roz aate the marzi se apni wo

ek din bulaya hum ne to naraaz ho gae

pal pal badalte rang hain insan kis kis tarah

samjha tha jin ko dost daghabaz ho gae

jin ka koi ata na pata tha kisi ko bhi

chiDiya hui jawan to kai baz ho gae

wo raqs tha ki KHun se zamin lal ho gai

KHamosh jitne bhi the wahan saz ho gae

aanand kis tarah se badalta hai waqt bhi

buzdil jo kal talak the wo jaan-baz ho gae