uljha dil-e-sitam-zada zulf-e-butan se aaj

uljhā dil-e-sitam-zada zulf-e-butāñ se aaj

nāzil huī balā mire sar par kahāñ se aaj

taḌpūñgā hijr-e-yār meñ hai raat chaudhvīñ

tan chāndnī meñ hogā muqābil katāñ se aaj

do-chār rashk-e-māh bhī hamrāh chāhiyeñ

vaada hai chāndnī meñ kisī mehrbāñ se aaj

hañgām-e-vasl radd-o-badal mujh se hai abas

niklegā kuchh na kaam nahīñ aur haañ se aaj

qa.ar-e-badan meñ ruuh pukārī ye vaqt-e-naza.a

muddat ke baad uThte haiñ ham is makāñ se aaj

khīñchī hai charḳh ne bhī kisī maañg kī shabīh

sābit huī ye baat mujhe kahkashāñ se aaj

andher thā nigāh-e-'amānat' meñ shaam sahar

tum chāñd kī tarah nikal aa.e kahāñ se aaj

uljha dil-e-sitam-zada zulf-e-butan se aaj

nazil hui bala mere sar par kahan se aaj

taDpunga hijr-e-yar mein hai raat chaudhwin

tan chandni mein hoga muqabil katan se aaj

do-chaar rashk-e-mah bhi hamrah chahiyen

wada hai chandni mein kisi mehrban se aaj

hangam-e-wasl radd-o-badal mujh se hai abas

niklega kuchh na kaam nahin aur han se aaj

qar-e-badan mein ruh pukari ye waqt-e-naza

muddat ke baad uThte hain hum is makan se aaj

khinchi hai charKH ne bhi kisi mang ki shabih

sabit hui ye baat mujhe kahkashan se aaj

andher tha nigah-e-'amanat' mein sham sahar

tum chand ki tarah nikal aae kahan se aaj