uljhe kanTon se ki khele gul-e-tar se pahle

uljhe kāñToñ se ki khele gul-e-tar se pahle

fikr ye hai ki sabā aa.e kidhar se pahle

jām-o-paimāna-o-sāqī kā gumāñ thā lekin

dīda-e-tar hī thā yaañ dīda-e-tar se pahle

abr-e-naisāñ kī na barakat hai na faizān-e-bahār

qatre gum ho ga.e ta.amīr-e-guhar se pahle

jam gayā dil meñ lahū suukh ga.e āñkhoñ meñ ashk

tham gayā dard-e-jigar rañg-e-sahar se pahle

qāfile aa.e to the na.aroñ ke parcham le kar

sar-nigūñ ho ga.ī har aah asar se pahle

ḳhūn-e-sar bah gayā maut aa ga.ī dīvānoñ ko

bārish-e-sañg se tūfān-e-sharar se pahle

surḳhī-e-ḳhūn-e-tamannā kī mahak aatī hai

dil koī TuuTā hai shāyad gul-e-tar se pahle

maqtal-e-shauq ke ādāb nirāle haiñ bahut

dil bhī qātil ko diyā karte haiñ sar se pahle

uljhe kanTon se ki khele gul-e-tar se pahle

fikr ye hai ki saba aae kidhar se pahle

jam-o-paimana-o-saqi ka guman tha lekin

dida-e-tar hi tha yan dida-e-tar se pahle

abr-e-naisan ki na barakat hai na faizan-e-bahaar

qatre gum ho gae tamir-e-guhar se pahle

jam gaya dil mein lahu sukh gae aankhon mein ashk

tham gaya dard-e-jigar rang-e-sahar se pahle

qafile aae to the naron ke parcham le kar

sar-nigun ho gai har aah asar se pahle

KHun-e-sar bah gaya maut aa gai diwanon ko

barish-e-sang se tufan-e-sharar se pahle

surKHi-e-KHun-e-tamanna ki mahak aati hai

dil koi TuTa hai shayad gul-e-tar se pahle

maqtal-e-shauq ke aadab nirale hain bahut

dil bhi qatil ko diya karte hain sar se pahle