ulTi har ek rasm-e-jahan-e-shuur hai

ulTī har ek rasm-e-jahāñ-e-shu.ūr hai

sīdhī sī ik ġhazal mujhe likhnī zarūr hai

vahdat meñ e'tibār-e-hudūs-o-qidam nahīñ

thā jo butūn meñ ye vahī to zuhūr hai

tārik vahī hai jis ne kiyā kal ko iḳhtiyār

ya.anī harīs-tar hai vahī jo subūr hai

mutlaq yagāngī hai to nazdīk-o-dūr kyā

pahuñchā hai jo qarīb vahī duur duur hai

asl-e-hayāt hai yahī kahte haiñ jis ko maut

jiine kī aarzū hai to marnā zarūr hai

iqrār-e-bandagī hai ḳhudā.ī kā idda.ā

ijz-o-niyāz kyā hai kamāl-e-ġhurūr hai

ummīd kījiye agar ummīd kuchh nahīñ

ġham khā.iye bahut jo ḳhayāl-e-surūr hai

zulf-e-siyāh se ruḳh-e-tābāñ kā husn hai

kahte ho jis ko dev haqīqat meñ huur hai

be-ma.asiyat ḳhazāna-e-rahmat hai rā.egāñ

sach pūchhiye to jurm na karnā qusūr hai

iz.hār-e-jān-e-pāk hai jism-e-kasīf se

be-pardagī hijāb hai zulmat hī nuur hai

bilittifāq hastī-e-vahmī hai niyyatī

hushiyār hai jo nashsha-e-ġhaflat meñ chuur hai

aalā thā jis kā rutba vo asfal meñ hai asiir

saff-e-na.āl moqif-e-sadrussudūr hai

hai raah kī talāsh to kar gumrahī talab

aaqil vahī hai aql meñ jis kī futūr hai

bedārī-e-vajūd hai ḳhvāb-e-adam meñ ġharq

lab band ho ga.e yahī shor-e-nushūr hai

har chand shaġhl-e-sher nahīñ āj-kal zarūr

nazrāna piir jī ke liye kuchh zarūr hai

ulTi har ek rasm-e-jahan-e-shuur hai

sidhi si ek ghazal mujhe likhni zarur hai

wahdat mein e'tibar-e-hudus-o-qidam nahin

tha jo butun mein ye wahi to zuhur hai

tarik wahi hai jis ne kiya kal ko iKHtiyar

yani haris-tar hai wahi jo subur hai

mutlaq yagangi hai to nazdik-o-dur kya

pahuncha hai jo qarib wahi dur dur hai

asl-e-hayat hai yahi kahte hain jis ko maut

jine ki aarzu hai to marna zarur hai

iqrar-e-bandagi hai KHudai ka iddaa

ijz-o-niyaz kya hai kamal-e-ghurur hai

ummid kijiye agar ummid kuchh nahin

gham khaiye bahut jo KHayal-e-surur hai

zulf-e-siyah se ruKH-e-taban ka husn hai

kahte ho jis ko dew haqiqat mein hur hai

be-masiyat KHazana-e-rahmat hai raegan

sach puchhiye to jurm na karna qusur hai

izhaar-e-jaan-e-pak hai jism-e-kasif se

be-pardagi hijab hai zulmat hi nur hai

bilittifaq hasti-e-wahmi hai niyyati

hushiyar hai jo nashsha-e-ghaflat mein chur hai

aala tha jis ka rutba wo asfal mein hai asir

saff-e-naal moqif-e-sadrussudur hai

hai rah ki talash to kar gumrahi talab

aaqil wahi hai aql mein jis ki futur hai

bedari-e-wajud hai KHwab-e-adam mein gharq

lab band ho gae yahi shor-e-nushur hai

har chand shaghl-e-sher nahin aaj-kal zarur

nazrana pir ji ke liye kuchh zarur hai