umid-e-mehr par ek hasrat-e-dil hum bhi rakhte the

umīd-e-mehr par ik hasrat-e-dil ham bhī rakhte the

tamannā vasl kī ai māh-e-kāmil ham bhī rakhte the

kabhī gulzār dāġh-e-ishq se dil ham bhī rakhte hai

kabhī ik taaza gulshan ai anādil ham bhī rakhte the

kisī din to vo bahr-e-husn aa kar zeb-bar hotā

ki āġhosh-e-tamannā shakl-e-sāhil ham bhī rakhte the

alag tū bazm se uTh kar jo sun letā to kah dete

ki kuchh kuchh iltijā ai zeb-e-mahfil ham bhī rakhte the

hameñ be-maut kyuuñ maarā ajal tū kis liye aa.ī

havā-e-bosa-e-shamshīr-e-qātil ham bhī rakhte the

hamāre dil kā uqda kyuuñ na ai ġhuncha-dahan kholā

havas bose kī thī thoḌī sī mushkil ham bhī rakhte the

kareñ ab kyā kahāñ DhūñDheñ gañvāyā kū-e-gesū meñ

kabhī yādash-ba-ḳhair ai hamdamo dil ham bhī rakhte the

hamārā imtihāñ o qadr-andāz lāzim thā

dil-e-majrūh-o-muztar jān-e-bismil ham bhī rakhte the

kiyā pāmāl us ko kyuuñ na tum ne saath sabze ke

tumhāre zer-e-pā ai jān-e-jāñ dil ham bhī rakhte the

nahīñ ab kasrat-e-dāġh-e-junūñ se lā.eq-e-hadiya

kabhī dil peshkash karne ke qābil ham bhī rakhte the

haqārat se na dekho aaj ham ko ai parī-rūyo

kabhī tum sā koī zohra-shamā.il ham bhī rakhte the

'ajab hai kyā huī ulfat vo ai jaañ donoñ jānib kī

yahī dil tum bhī rakhte the yahī dil ham bhī rakhte the

yūñhī shab bhar jalā karte the yād-e-sho.ala-e-ruḳh meñ

yahī sozish kabhī ai sham'-e-mahfil ham bhī rakhte the

lab-e-jāñ-baḳhsh par kyā fauq dete chashm-e-fattāñ ko

ki 'anjum' kuchh tamīz-e-haqq-o-bātil ham bhī rakhte the

umid-e-mehr par ek hasrat-e-dil hum bhi rakhte the

tamanna wasl ki ai mah-e-kaamil hum bhi rakhte the

kabhi gulzar dagh-e-ishq se dil hum bhi rakhte hai

kabhi ek taza gulshan ai anadil hum bhi rakhte the

kisi din to wo bahr-e-husn aa kar zeb-bar hota

ki aaghosh-e-tamanna shakl-e-sahil hum bhi rakhte the

alag tu bazm se uTh kar jo sun leta to kah dete

ki kuchh kuchh iltija ai zeb-e-mahfil hum bhi rakhte the

hamein be-maut kyun mara ajal tu kis liye aai

hawa-e-bosa-e-shamshir-e-qatil hum bhi rakhte the

hamare dil ka uqda kyun na ai ghuncha-dahan khola

hawas bose ki thi thoDi si mushkil hum bhi rakhte the

karen ab kya kahan DhunDhen ganwaya ku-e-gesu mein

kabhi yaadash-ba-KHair ai hamdamo dil hum bhi rakhte the

hamara imtihan o qadr-andaz lazim tha

dil-e-majruh-o-muztar jaan-e-bismil hum bhi rakhte the

kiya pamal us ko kyun na tum ne sath sabze ke

tumhaare zer-e-pa ai jaan-e-jaan dil hum bhi rakhte the

nahin ab kasrat-e-dagh-e-junun se laeq-e-hadiya

kabhi dil peshkash karne ke qabil hum bhi rakhte the

haqarat se na dekho aaj hum ko ai pari-ruyo

kabhi tum sa koi zohra-shamail hum bhi rakhte the

'ajab hai kya hui ulfat wo ai jaan donon jaanib ki

yahi dil tum bhi rakhte the yahi dil hum bhi rakhte the

yunhi shab bhar jala karte the yaad-e-shoala-e-ruKH mein

yahi sozish kabhi ai sham'-e-mahfil hum bhi rakhte the

lab-e-jaan-baKHsh par kya fauq dete chashm-e-fattan ko

ki 'anjum' kuchh tamiz-e-haqq-o-baatil hum bhi rakhte the