bahut dinon se mujhe tera intizar hai aa ja

bahut dinoñ se mujhe terā intizār hai aa jā

aur ab to ḳhaas vahī mausam-e-bahār hai aa jā

kahāñ ye hosh ki uslūb-e-tāza se tujhe likhūñ

ki ruuh tere liye saḳht be-qarār hai aa jā

guzar chalī haiñ bahut ġham kī shorisheñ bhī hadoñ se

magar abhī to tirā sab pe iḳhtiyār hai aa jā

vo terī yaad ki ab tak sukūn-e-qalb-e-tapāñ thī

tirī qasam hai ki ab vo bhī nāgavār hai aa jā

ġhazal ke shikve ġhazal ke mu'āmalāt judā haiñ

mirī hī tarah se to bhī vafā-shi'ār hai aa jā

badal rahā ho zamāna magar jahān-e-tamannā

tire liye to abad tak bhī sāzgār hai aa jā

hazār tarah ke afkār dil ko rauñd rahe haiñ

muqāble meñ tire ranj-e-rozgār hai aa jā

bahut dinon se mujhe tera intizar hai aa ja

aur ab to KHas wahi mausam-e-bahaar hai aa ja

kahan ye hosh ki uslub-e-taza se tujhe likhun

ki ruh tere liye saKHt be-qarar hai aa ja

guzar chali hain bahut gham ki shorishen bhi hadon se

magar abhi to tera sab pe iKHtiyar hai aa ja

wo teri yaad ki ab tak sukun-e-qalb-e-tapan thi

teri qasam hai ki ab wo bhi nagawar hai aa ja

ghazal ke shikwe ghazal ke mu'amalat juda hain

meri hi tarah se to bhi wafa-shi'ar hai aa ja

badal raha ho zamana magar jahan-e-tamanna

tere liye to abad tak bhi sazgar hai aa ja

hazar tarah ke afkar dil ko raund rahe hain

muqable mein tere ranj-e-rozgar hai aa ja