jo banda-e-KHuda tha KHuda hone wala hai

jo banda-e-ḳhudā thā ḳhudā hone vaalā hai

kyā kuchh abhī to jalva-numā hone vaalā hai

ye bhī durust hai ki payambar nahīñ huuñ maiñ

hai ye bhī sach ki merā kahā hone vaalā hai

kuchh ashk-e-ḳhūñ bachā ke bhī rakhiye ki shahr meñ

jo ho chukā hai us se sivā hone vaalā hai

vo vaqt hai ki ḳhalq pe har zulm-e-nā-ravā

allāh kā naam le ke ravā hone vaalā hai

ik ḳhauf hai ki hone hī vaalā hai jā-guzīñ

ik ḳhvāb hai ki sab se judā hone vaalā hai

rañg-e-havā meñ hai ajab asrār sā koī

koī bhī jāntā nahīñ kyā hone vaalā hai

ḳhush thā siyāh-ḳhāna-e-dil meñ bahut lahū

is qaid se magar ye rihā hone vaalā hai

ye tiir āḳhirī hai bas us kī kamān meñ

aur vo bhī dekh lenā ḳhatā hone vaalā hai

ik lahar hai ki mujh meñ uchhalne ko hai 'zafar'

ik lafz hai ki mujh se adā hone vaalā hai

jo banda-e-KHuda tha KHuda hone wala hai

kya kuchh abhi to jalwa-numa hone wala hai

ye bhi durust hai ki payambar nahin hun main

hai ye bhi sach ki mera kaha hone wala hai

kuchh ashk-e-KHun bacha ke bhi rakhiye ki shahr mein

jo ho chuka hai us se siwa hone wala hai

wo waqt hai ki KHalq pe har zulm-e-na-rawa

allah ka nam le ke rawa hone wala hai

ek KHauf hai ki hone hi wala hai ja-guzin

ek KHwab hai ki sab se juda hone wala hai

rang-e-hawa mein hai ajab asrar sa koi

koi bhi jaanta nahin kya hone wala hai

KHush tha siyah-KHana-e-dil mein bahut lahu

is qaid se magar ye riha hone wala hai

ye tir aaKHiri hai bas us ki kaman mein

aur wo bhi dekh lena KHata hone wala hai

ek lahar hai ki mujh mein uchhalne ko hai 'zafar'

ek lafz hai ki mujh se ada hone wala hai