mazaq-e-gham se nikhrega shuur-e-karwan kab tak

mazāq-e-ġham se nikhregā shu.ūr-e-kārvāñ kab tak

asīr-e-rahbarī DhūñDeñge qadmoñ ke nishāñ kab tak

zarā zaḳhmoñ pe dil ke aur thoḌī sī namak-pāshī

nikhartā hī nahīñ dekheñ ye husn-e-gulsitāñ kab tak

ḳhudī ko bech kar sajda koī sajda nahīñ hotā

jabīn-e-shauq se kah do talāsh-e-āstāñ kab tak

mire afkār meñ bālīdgī hai husn-e-qismat kab

tere hoñToñ pe ai shā.ir hadīs-e-dil-barāñ kab tak

numūd-e-sub.h se pahle sar-e-manzil pahuñchnā hai

dhuñdlakoñ se ye ghabrāhaT amīr-e-kārvāñ kab tak

kafan bāñdhe hue sar se shu.ūr-e-zindagī ubhrā

tirī nazroñ meñ saaqī gardish-e-ratl-e-garāñ kab tak

zamāna karvaTeñ letā hai ta.amīrī irādoñ se

na jaane terī āñkhoñ meñ rahe ḳhvāb-e-girāñ kab tak

asīroñ kā ta.alluq kyā bahār-e-sahn-e-gulshan se

qafas meñ aa.egī jaane bahār-e-jāvedāñ kab tak

ḳhudī se kaam le taqdīr shāyad kaam aa jaa.e

hujūm-e-ġham meñ 'fā.iq' shorish-e-āh-o-fuġhāñ kab tak

mazaq-e-gham se nikhrega shuur-e-karwan kab tak

asir-e-rahbari DhunDenge qadmon ke nishan kab tak

zara zaKHmon pe dil ke aur thoDi si namak-pashi

nikharta hi nahin dekhen ye husn-e-gulsitan kab tak

KHudi ko bech kar sajda koi sajda nahin hota

jabin-e-shauq se kah do talash-e-astan kab tak

mere afkar mein baalidgi hai husn-e-qismat kab

tere honTon pe ai shair hadis-e-dil-baran kab tak

numud-e-subh se pahle sar-e-manzil pahunchna hai

dhundlakon se ye ghabrahaT amir-e-karwan kab tak

kafan bandhe hue sar se shuur-e-zindagi ubhra

teri nazron mein saqi gardish-e-ratl-e-garan kab tak

zamana karwaTen leta hai tamiri iradon se

na jaane teri aankhon mein rahe KHwab-e-giran kab tak

asiron ka talluq kya bahaar-e-sahn-e-gulshan se

qafas mein aaegi jaane bahaar-e-jawedan kab tak

KHudi se kaam le taqdir shayad kaam aa jae

hujum-e-gham mein 'faiq' shorish-e-ah-o-fughan kab tak