ummid ke diye ki muKhaalif hawa bhi hai

ummīd ke diye kī muḳhālif havā bhī hai

laḌne kā āñdhiyoñ se magar hausla bhī hai

jaane ko tere shahr se tayyār haiñ magar

ham jā nahīñ sakeñge hameñ ye patā bhī hai

ham ne bhī zulmatoñ ko miTāyā hai apne taur

sūraj ke saath saath hamārā diyā bhī hai

koī to hai jo ḳhāna-e-hastī meñ hai muqīm

āvāz meñ hamārī vahī boltā bhī hai

ummīd-e-sub.h-e-vasl kā dam TūTne lagā

kuchh kah shab-e-firāq tirī intihā bhī hai

chalte chalo ki manzileñ aa kar mileñgī ḳhud

kuchh dar hue haiñ band to ik dar khulā bhī hai

ham ḳhud-pasandiyoñ se nikalne lage 'shajar'

ham sochne lage haiñ hamārā ḳhudā bhī hai

ummid ke diye ki muKHalif hawa bhi hai

laDne ka aandhiyon se magar hausla bhi hai

jaane ko tere shahr se tayyar hain magar

hum ja nahin sakenge hamein ye pata bhi hai

hum ne bhi zulmaton ko miTaya hai apne taur

suraj ke sath sath hamara diya bhi hai

koi to hai jo KHana-e-hasti mein hai muqim

aawaz mein hamari wahi bolta bhi hai

ummid-e-subh-e-wasl ka dam TuTne laga

kuchh kah shab-e-firaq teri intiha bhi hai

chalte chalo ki manzilen aa kar milengi KHud

kuchh dar hue hain band to ek dar khula bhi hai

hum KHud-pasandiyon se nikalne lage 'shajar'

hum sochne lage hain hamara KHuda bhi hai