umr be-wajh guzare bhi nahin ja sakte

umr be-vaj.h guzāre bhī nahīñ jā sakte

itne zinda haiñ ki maare bhī nahīñ jā sakte

haal ab ye hai ki dariyā meñ bhī lagtā nahīñ jī

aur kisī ek kināre bhī nahīñ jā sakte

us jagah jā ke vo baiThā hai bharī mahfil meñ

ab jahāñ mere ishāre bhī nahīñ jā sakte

zeb-tan itne kiye dil ne havas ke malbūs

ki shab-e-vasl utāre bhī nahīñ jā sakte

niiñd se us ko jagānā bhī zarūrī hai bahut

rāt-bhar us ko pukāre bhī nahīñ jā sakte

saarī shakloñ se pare hai vo hamārā mahbūb

so tasavvur ke sahāre bhī nahīñ jā sakte

jītne kā na koī shauq na taufīq hameñ

lekin is tarah to haare bhī nahīñ jā sakte

falak-e-ishq pe tā-der Thaharnā hai muhāl

is bulandī se utāre bhī nahīñ jā sakte

farhat-ehsās tujhe man.a hai jaanā us tak

kyā tire ḳhuun ke dhāre bhī nahīñ jā sakte

umr be-wajh guzare bhi nahin ja sakte

itne zinda hain ki mare bhi nahin ja sakte

haal ab ye hai ki dariya mein bhi lagta nahin ji

aur kisi ek kinare bhi nahin ja sakte

us jagah ja ke wo baiTha hai bhari mahfil mein

ab jahan mere ishaare bhi nahin ja sakte

zeb-tan itne kiye dil ne hawas ke malbus

ki shab-e-wasl utare bhi nahin ja sakte

nind se us ko jagana bhi zaruri hai bahut

raat-bhar us ko pukare bhi nahin ja sakte

sari shaklon se pare hai wo hamara mahbub

so tasawwur ke sahaare bhi nahin ja sakte

jitne ka na koi shauq na taufiq hamein

lekin is tarah to haare bhi nahin ja sakte

falak-e-ishq pe ta-der Thaharna hai muhaal

is bulandi se utare bhi nahin ja sakte

farhat-ehsas tujhe mana hai jaana us tak

kya tere KHun ke dhaare bhi nahin ja sakte