umr-bhar dard ke rishton ko nibhane se raha

umr-bhar dard ke rishtoñ ko nibhāne se rahā

zindagī meñ to tire naaz uThāne se rahā

jab bhī dekhā to kināroñ pe taḌaptā dekhā

ye samundar to mirī pyaas bujhāne se rahā

bas yahī soch ke sar apnā qalam kar Daalā

ab vo ilzām mire sar to lagāne se rahā

is zamāne meñ jahālat se guzar hotī hai

ab hunar se to koī ghar ko chalāne se rahā

ham hī tarkīb kareñ koī ujāloñ ke liye

ab añdherā to charāġhoñ ko jalāne se rahā

vaqt ke marmarīñ patthar pe ġhazal likhtā huuñ

ye ibārat koī mausam to miTāne se rahā

be-ta.alluq to nahīñ umr guzārī hai 'nafas'

rishta-e-ġhair sahī kuchh to zamāne se rahā

umr-bhar dard ke rishton ko nibhane se raha

zindagi mein to tere naz uThane se raha

jab bhi dekha to kinaron pe taDapta dekha

ye samundar to meri pyas bujhane se raha

bas yahi soch ke sar apna qalam kar Dala

ab wo ilzam mere sar to lagane se raha

is zamane mein jahaalat se guzar hoti hai

ab hunar se to koi ghar ko chalane se raha

hum hi tarkib karen koi ujalon ke liye

ab andhera to charaghon ko jalane se raha

waqt ke marmarin patthar pe ghazal likhta hun

ye ibarat koi mausam to miTane se raha

be-talluq to nahin umr guzari hai 'nafas'

rishta-e-ghair sahi kuchh to zamane se raha