umr-bhar ishq kisi taur na kam ho aamin

umr-bhar ishq kisī taur na kam ho āmīn

dil ko har roz atā ne.amat-e-ġham ho āmīn

mere kaase ko hai bas chaar hī sikkoñ kī talab

ishq ho vaqt ho kāġhaz ho qalam ho āmīn

hujra-e-zāt meñ yā mahfil-e-yārāñ meñ rahūñ

fikr duniyā kī mujhe ho bhī to kam ho āmīn

jab maiñ ḳhāmosh rahūñ raunaq-e-mahfil Thahrūñ

aur jab baat karūñ baat meñ dam ho āmīn

log chāheñ bhī to ham ko na judā kar paa.eñ

yuuñ mirī zaat tirī zaat meñ zam ho āmīn

ishq meñ Duub ke jo kuchh bhī likhūñ kāġhaz par

ḳhud-baḳhud lauh-e-zamāna pe raqam ho āmīn

na Darā paa.e mujhe tīrgī-e-dasht-e-firāq

har taraf raushnī-e-dīda-e-nam ho āmīn

'mīr' ke sadqe mire harf ko darveshī mile

duur mujh se havas-e-dām-o-diram ho āmīn

mere kānoñ ne sunā hai tire baare meñ bahut

merī āñkhoñ pe bhī thoḌā sā karam ho āmīn

jab zamīñ āḳhirī hiddat se pighalne lag jaa.e

ishq kī chhāñv mire sar ko baham ho āmīn

umr-bhar ishq kisi taur na kam ho aamin

dil ko har roz ata neamat-e-gham ho aamin

mere kase ko hai bas chaar hi sikkon ki talab

ishq ho waqt ho kaghaz ho qalam ho aamin

hujra-e-zat mein ya mahfil-e-yaran mein rahun

fikr duniya ki mujhe ho bhi to kam ho aamin

jab main KHamosh rahun raunaq-e-mahfil Thahrun

aur jab baat karun baat mein dam ho aamin

log chahen bhi to hum ko na juda kar paen

yun meri zat teri zat mein zam ho aamin

ishq mein Dub ke jo kuchh bhi likhun kaghaz par

KHud-baKHud lauh-e-zamana pe raqam ho aamin

na Dara pae mujhe tirgi-e-dasht-e-firaq

har taraf raushni-e-dida-e-nam ho aamin

'mir' ke sadqe mere harf ko darweshi mile

dur mujh se hawas-e-dam-o-diram ho aamin

mere kanon ne suna hai tere bare mein bahut

meri aankhon pe bhi thoDa sa karam ho aamin

jab zamin aaKHiri hiddat se pighalne lag jae

ishq ki chhanw mere sar ko baham ho aamin