umr jitni bhi kaTi uske bharose pe kaTi

umr jitnī bhī kaTī us ke bharose pe kaTī

aur ab sochtā huuñ us kā bharosa kyā thā

tum ne achchhā kiyā dāman ko bachā kar guzre

ham to bas raah kī miTTī the hamārā kyā thā

is liye aa ke tire shahr meñ ābād hue

ham ko is dasht-navardī se bhī lenā kyā thā

ye agar sach hai ki ham us se bichhaḌ kar ḳhush the

raat din us kī taraf dekhte rahnā kyā thā

shauq-e-nazāra ne āñkheñ hī nahīñ khulne diiñ

ye kisī ko nahīñ ma.alūm ki dekhā kyā thā

paañv mere bhī nahīñ uThte the ghar kī jānib

tum bhī jaate hue lauT aa.e the aisā kyā thā

jaal meñ us ke giraftār to honā thā hameñ

us ke jaadū se nikalne kā tarīqa kyā thā

sub.h pahchān na paayā koī sūrat terī

dil-e-hañgāma-talab raat tamāshā kyā thā

sub.h sūraj bhī use dekhne aayā 'shahzād'

raat chamkā thā jabīñ par jo sitāra kyā thā

umr jitni bhi kaTi us ke bharose pe kaTi

aur ab sochta hun us ka bharosa kya tha

tum ne achchha kiya daman ko bacha kar guzre

hum to bas rah ki miTTi the hamara kya tha

is liye aa ke tere shahr mein aabaad hue

hum ko is dasht-nawardi se bhi lena kya tha

ye agar sach hai ki hum us se bichhaD kar KHush the

raat din us ki taraf dekhte rahna kya tha

shauq-e-nazara ne aankhen hi nahin khulne din

ye kisi ko nahin malum ki dekha kya tha

panw mere bhi nahin uThte the ghar ki jaanib

tum bhi jate hue lauT aae the aisa kya tha

jal mein us ke giraftar to hona tha hamein

us ke jadu se nikalne ka tariqa kya tha

subh pahchan na paya koi surat teri

dil-e-hangama-talab raat tamasha kya tha

subh suraj bhi use dekhne aaya 'shahzad'

raat chamka tha jabin par jo sitara kya tha