umr ki sari thakan lad ke ghar jata hun

'umr kī saarī thakan laad ke ghar jaatā huuñ

raat bistar pe maiñ sotā nahīñ mar jaatā huuñ

aksar auqāt bhare shahr ke sannāTe meñ

is qadar zor se hañstā huuñ ki Dar jaatā huuñ

mujh se pūchhe to sahī ā.īna-ḳhāna merā

ḳhāl-o-ḳhad le ke maiñ hamrāh kidhar jaatā huuñ

dil Thahar jaatā hai bhūlī huī manzil meñ kahīñ

maiñ kisī dūsre raste se guzar jaatā huuñ

sahmā rahtā huuñ bahut halqa-e-ahbāb meñ maiñ

chaar dīvār meñ aate hī bikhar jaatā huuñ

mere aane kī ḳhabar sirf diyā rakhtā hai

maiñ havāoñ kī tarah ho ke guzar jaatā huuñ

maiñ ne jo apne ḳhilāf aap gavāhī dī hai

vo tire haq meñ nahīñ hai to mukar jaatā huuñ

'umr ki sari thakan lad ke ghar jata hun

raat bistar pe main sota nahin mar jata hun

aksar auqat bhare shahr ke sannaTe mein

is qadar zor se hansta hun ki Dar jata hun

mujh se puchhe to sahi aaina-KHana mera

KHal-o-KHad le ke main hamrah kidhar jata hun

dil Thahar jata hai bhuli hui manzil mein kahin

main kisi dusre raste se guzar jata hun

sahma rahta hun bahut halqa-e-ahbab mein main

chaar diwar mein aate hi bikhar jata hun

mere aane ki KHabar sirf diya rakhta hai

main hawaon ki tarah ho ke guzar jata hun

main ne jo apne KHilaf aap gawahi di hai

wo tere haq mein nahin hai to mukar jata hun